Kerry vill ráðgjöf Íslendinga

Össur Skarphéðinsson ræddi við John Kerry, utanríkisráðherra Bandaríkjanna, á fundi með utanríkisráðherrum Atlantshafsbandalagsins (NATO) í fyrrakvöld.

Þeir ræddu meðal annars samvinnu Íslands og Bandaríkjanna á norðurslóðum og áhuga Kerrys á því að Bandaríkjamenn gerist aðilar að hafréttarsáttmála Sameinuðu þjóðanna.

Kerry lýsti yfir vilja sínum til að nýta reynslu og þekkingu Íslendinga á sviði fiskveiðistjórnunar og kvaðst vilja fá íslenska stjórnmálamenn og sérfræðinga til ráðgjafar á því sviði sem fyrst.

Í ræðum sínum á fundinum lagði Össur áherslu á að Bandaríkjamenn myndu beita sér fyrir lausn á deilunni á milli Ísraels og Palestínu.

Þá hvatti hann aðra fundargesti til að styðja stjórnarandstöðuna í Sýrlandi í því að búa til nothæft stjórnkerfi.