Sykursýki í hundum og köttum algengari

Tíðni sykursýki hjá köttum og hundum hefur aukist á undanförnum árum. Þó nokkur fjöldi dýra er á insúlíni. Lífsstíllinn er í sumum tilfellum ástæðan fyrir sykursýkinni, að sögn Lísu Bjarnadóttur, dýralæknis á Dýraspítalanum í Víðidal.

„Ég er búin að vera dýralæknir í þrettán ár. Þegar ég byrjaði þekktist þetta varla. Nú sjáum við að þetta er orðið frekar algengt," greinir Lísa frá.

Hún getur þess að sum þessara dýra, þá sérstaklega kettir, séu með áunna sykursýki. Þá dugi að setja þá á insúlín og sérstakt fæði í ákveðinn tíma. „Það er einn og einn svoleiðis en sem betur fer er fólk meðvitað um að passa holdafarið á þeim."

Lísa segir fóðrið misjafnt eftir tegundum. „Betri tegundirnar eru nú þannig að þær eru sérsniðnar að þörfum katta og hunda og það er mikið lagt í rannsóknarvinnu í sambandi við það."

Sumum hundategundum er hættara við að fá sykursýki en öðrum. „Þetta eru erfðafræðilegir þættir en kannski spilar fæðið einhverja rullu í því. Það er ekki hægt að fullyrða um slíkt í köttum."

Ef dýrin reynast vera með sykursýki eru þau sett á insúlín og fá þá daglega meðhöndlun. „Það er til sérstök tegund af insúlíni fyrir dýr en hún hentar ekki öllum. Við erum líka með dýr á mannainsúlíni. Það þarf að sprauta dýrin daglega og fólk er bundið yfir þessu. Ef vel á að vera þarf að mæla reglulega sykurmagnið í blóðinu til að kanna hvort sprautu sé þörf. Samtímis þarf að gæta þess að dýrin borði.

Þetta er eins og að annast langveikt barn."

Í samantekt sænska tryggingafélagsins Agria Djurförsäkringar kemur fram að fjöldi katta í Svíþjóð sem fær sykursýki hefur meira en tvöfaldast á tveimur árum. Í sænskum fjölmiðlum er haft eftir dýralækninum Emmu Strage að kettir hreyfi sig ekki nógu mikið og fái rangt fóður. Algengt er í Svíþjóð að kettir séu eingöngu hafðir innandyra.

Lísa segir að engar tölur séu til yfir fjölgun sykursjúkra dýra á Íslandi en aukningin sé greinileg.