Geiri.net snýr aftur

„Þessi Facebook-síða hefur verið til heillengi en fáir tekið eftir henni. Ég kíkti á hana um daginn og hugsaði með mér hvort það væri ekki sniðugt að setja myndirnar þarna inn,“ segir Ásgeir Freyr Kristinsson. Ásgeir var iðinn við að mynda næturlífið í Reykjavík á árunum 2001 til 2003 og birti afraksturinn á vefsíðunum Geiri.net og Núlleinn.is. Nú hafa myndirnar öðlast nýtt líf á Facebook við misjafnar undirtektir myndefnanna.

Sumarið 2001 hóf Ásgeir að mynda fólk á næturlífinu með stafrænni upptökuvél og setti afraksturinn á vefsíðuna Geiri.net. Síðan vakti mikla lukku meðal ungs fólks og í kjölfarið hóf Ásgeir einnig að mynda fyrir vefsíðuna Núlleinn.is. „Ég var meira og minna á djamminu allar helgar í eitt og hálft ár og fékk svo endanlega nóg í byrjun árs 2003. Áhugi fólks á djammmyndum hafði líka fjarað út um það leyti þannig að síðan lagðist af,“ útskýrir Ásgeir. Hann kveðst eiga um fimmtán þúsund ljósmyndir frá skemmtanalífinu í Reykjavík á þessum tíma og er það tímafrek iðja að hlaða þeim öllum inn á Facebook.

„Ég setti inn myndir frá júní og júlí árið 2001 í byrjun vikunnar. Allt miðvikudagskvöldið fór í að setja inn seinni hlutann af júlímyndunum. Hver mánuður telur örugglega um 500 til 800 myndir. Þetta er vissulega tímafrekt en ég geri þetta bara í rólegheitunum þegar ég á lausa stund.“ Spurður út í viðbrögð fólks við myndunum segir hann þær fara misvel í mannskapinn, margir hafi gaman af en aðrir hafa óskað eftir því að myndirnar séu fjarlægðar. „Ég skil að margir séu kannski komnir með börn eða í þannig vinnu að það þyki óæskilegt að birta svona myndir á Facebook og þá fjarlægi ég þær um leið,“ segir Ásgeir, sem í dag er kvæntur og starfar sem hugbúnaðarsérfræðingur hjá Advania. „Það má segja að ljósmyndunin hafi verið upphafið að starfsferlinum,“ segir hann að lokum.