Ræða flugsamgöngur til Kína

Ögmundur Jónasson innanríkisráðherra er nú í vikuheimsókn í kínversku borgunum Peking og Sjanghæ, ásamt aðstoðarkonu sinni, ráðuneytisstjóra og tveimur skrifstofustjórum innanríkisráðuneytisins. Heimsóknin er margþætt, en meðal annars verður rætt við kínversk yfirvöld varðandi loftferðasamninga til Kína.

Samkvæmt upplýsingum úr innanríkisráðuneytinu hefur flugfélagið Atlanta óskað eftir því að komið verði á formlegu sambandi milli ríkjanna tveggja varðandi flug og eru samræður komnar á lokastig.

Framkvæmdastjóri Atlanta er staddur erlendis en Stefán Eyjólfsson, starfsmannastjóri félagsins á Íslandi, segir kínversk flugmálayfirvöld hafa aðrar reglur en önnur Asíulönd hvað flugleyfi varðar.

„Þau leyfa ekki svokallaða „wet-lease samninga," það er að segja að við leigjum okkar vélar með áhöfnum til annarra," segir hann. „Þegar við fljúgum til dæmis fyrir Saudi Arabian Airlines leigjum við vélarnar okkar til þeirra. En við getum ekki flogið til Kína vegna þessara reglna."

Vonast er til, með heimsókn innanríkisráðherra, að hægt verði að gera flugfélaginu auðveldara að nýta vélar sínar í þessum heimshluta og gera mögulega samninga milli Íslands og Kína í framtíðinni.