Mál lögreglumanns fellt niður

Ríkissaksóknari hefur fellt niður mál lögreglumanns á Blönduósi sem hafði sætt rannsókn vegna kynferðisbrots. Sami lögreglumaður var sýknaður af ákæru um annað kynferðisbrot í nóvember síðastliðnum.

Vilhjálmur H. Vilhjálmsson, verjandi mannsins, skrifar grein í Fréttablaðið í dag undir yfirskriftinni „Valdníðsla" þar sem hann gagnrýnir tilurð síðara málsins harkalega og krefst rannsóknar á „saknæmri og ólögmætri valdníðslu og annarri refsiverðri háttsemi lögreglunnar á Blönduósi".

Manninum hafði verið vikið frá störfum hjá lögreglunni eftir sakfellingu í Héraðsdómi Vesturlands. Dómnum var svo snúið í Hæstarétti og fimm dögum síðar skipaði embætti Ríkislögreglustjóra manninn aftur í embætti lögreglumanns.

„Tveimur dögum síðar ákvað lögreglustjórinn á Blönduósi að eigin frumkvæði að hefja rannsókn á meintri refsiverðri háttsemi [mannsins] sem á að hafa átt sér stað í mars 2010. Hver skyldi nú hafa verið tilgangur lögreglustjórans á Blönduósi að hefja rannsókn á þessu gamla máli á þessum tímapunkti?" spyr Vilhjálmur.

Hann vitnar til lögregluskýrslu af stúlkunni sem maðurinn var grunaður um að hafa brotið gegn í því máli, þar sem stúlkan hafi sagst alls ekki vilja kæra málið. Hún hafi hins vegar verið fengin til að lýsa hinu meinta broti skriflega sem „greiða" við lögregluna og gagngert til að hægt yrði að halda manninum frá störfum.

Þá heldur Vilhjálmur því fram að minnst fimm lögreglumenn á Blönduósi hafi verið í sambandi við stúlkuna strax vorið 2010 og hafi hvatt hana til að kæra samstarfsmann þeirra. Sumir hafi þá upplýst hana um hitt atvikið, sem hann var síðar sýknaður fyrir, og með því brotið þagnarskyldu.