Bongó á hlut í þremur skútum

Stephan Stephensen, meðlimur hljómsveitanna GusGus og Gluteus Maximus, er mikill skútuáhugamaður og á hlut í þremur skútum. Ein þeirra er staðsett á Íslandi en hinar erlendis.

Spurður út í skútuáhuga sinn segir Stephan, öðru nafni President Bongó, áhugann hafa fæðst í einkar saklausum kvöldverði í New York fyrir átta til tíu árum. „Áhuginn á siglingum fæddist hins vegar á seglbáti milli Ibiza og Formentera þegar ég var tólf ára og fékk kusk í augað. Það var fjarlægt með húsráði kapteinsins en framkvæmt af sætri stelpu og sleikt úr. Et voilá."

Stephan er með fullgild réttindi til að sigla allt að 24 metra langri skútu og að sjálfsögðu til að halda teiti um borð í hverri höfn. „Við Gluteus-menn hljótum að taka sjóleiðina á Sónar í Barselóna í sumar," segir hann en tvíeykinu hefur verið boðið að spila á hátíðinni í júní ásamt fleiri Íslendingum.

Hvernig er tilfinningin að sigla um á skútu? „Að sigla á rúmsjó án þess að sjá land er tilfinning sem allir ættu að upplifa, helst undir seglum. Þetta er frelsi sem á sér fáar hliðstæður. Vindurinn, sjórinn og söngur bátsins er eina tónlistin sem maður þarf á að halda í siglingum."

Aðspurður segir hann Sónar-hátíðina í Reykjavík, sem verður haldin um miðjan febrúar, leggjast vel í sig. „Bæði GusGus og Gluteus Maximus spila og það verður einkar gaman að fá að taka þátt með þeim báðum. Það er nefnilega ekkert sjálfsagt í þeim efnum því yfirstjórnin í Katalóníu hélt fast um valdtauminn."