Geta ekkert aðhafst í deilunni við CBS

Menntamálaráðuneytið á Íslandi getur ekki aðhafst vegna meintrar mismununar í inntökukröfum Viðskiptaháskólans í Kaupmannahöfn (CBS) um dönskukunnáttu. Þetta segir í svari ráðuneytisins við fyrirspurn Fréttablaðsins. Einn þeirra námsmanna sem kvörtuðu hyggst halda málinu til streitu.

Eins og fram hefur komið í Fréttablaðinu kvörtuðu sex námsmenn hið minnsta til íslenska sendiráðsins vegna þess sem þeir töldu of háar kröfur. Meðal annars telja þeir það viðmið CBS um að íslenskir stúdentar hafi lokið átján einingum í dönsku sem jafngildi A-stigs prófi þar í landi vera óraunhæft þar sem einungis stöku skólar hér á landi bjóði upp á meira en níu einingar. Skólinn var einnig sakaður um mismunun með því að brjóta gegn sáttmála Norðurlandaríkjanna sem kveður á um að tungumál ríkjanna séu metin til jafns milli landanna.

Í samtali við Fréttablaðið hafnaði talskona CBS því að þetta væri mismunun. Sama krafa, A-stigs próf í dönsku, væri sett öllum sem sæktu um nám á dönsku við skólann. Einnig væri í boði að taka stöðupróf sem fram færu tvisvar á ári.

Íslenska menntamálaráðuneytið sendi fyrirspurn til danskra stjórnvalda um málið og fékk þau svör í síðasta mánuði að hver skóli mætti setja sín viðmið varðandi A-stigs próf og CBS væru innan marka.

„Við sjáum ekki að ráðuneytið geti aðhafst varðandi ákvarðanir einstaka háskóla sem virðast teknar innan ramma viðeigandi reglugerða,“ segir í svari ráðuneytisins.

„Háskólinn kann hins vegar að bera ábyrgð gagnvart umsækjendum ef hann mismunar þeim eða gefur misvísandi upplýsingar.“

Einn námsmaðurinn sem fékk synjun, Gunnar Gíslason, segist í viðtali við Fréttablaðið ekki ætla að láta þetta stöðva sig. Rök Dananna séu meðal annars byggð á úreltri reglugerð um framhaldsskóla.

„Þetta er hrein og klár mismunun einfaldlega af því að Norðmenn, Svíar og Finnar fá að skipta út sínu móðurmáli fyrir dönsku en ekki Íslendingar. Það stríðir líka klárlega gegn meðalhófsreglu að krefjast átján eininga sem ekki er hægt að uppfylla.“

Gunnar segist munu leita til umboðsmanns danska þingsins ef ráðuneytið fellst ekki á hans rök.

„Þetta fer svo fyrir dómstóla ef með þarf.“

Fréttablaðinu er ekki kunnugt um að fleiri af stærri háskólum Danmerkur geri sömu kröfur um dönskukunnáttu, en fyrir liggur að kennslusvið Háskóla Íslands tekur Norðurlandabúa inn í nám á íslensku án sérstakra skilyrða.