Baldur: Rúnar hefur skólað mig mikið til

Það spilaði enginn betur í Pepsi-deildinni í sumar en KR-ingurinn Baldur Sigurðsson sem fékk 6,55 í meðaleinkunn hjá blaðamönnum Fréttablaðsins og Vísis í sumar. Baldur sló við FH-ingnum Birni Daníel Sverrissyni og Valsmanninum Hauki Páli Sigurðssyni sem komu í næstu sætum.

KR-ingar voru frábærir í sumar og enginn betri en Baldur. Liðið setti nýtt stigamet (52 stig), skoraði yfir 50 mörk og gat fyrst tryggt sér titilinn þegar liðið átti þrjá leiki eftir. Baldur skoraði átta mörk í 20 leikjum af miðjunni og var í hópi markahæstu manna.

Mörkin komu honum af stað

„Maður er alltaf dæmdur af mörkunum og það voru þau sem komu mér af stað í tímabilinu. Ég var ánægður með tímabilið í heild sinni. Ég spilaði framarlega á vellinum en svo leysti ég mjög marga leiki djúpur á miðjunni með Jónasi Guðna. Mér fannst ég aðlagast báðum hlutverkum vel. Ég hef líka verið að bíða eftir því undanfarin ár að ná að halda stöðugleikanum út heilt tímabil en ekki vera með einhverjar rokur hér og þar og detta svo niður,“ segir Baldur.

KR-ingar unnu tvöfalt árið 2011 og voru í titilbaráttunni árið eftir þar til liðið gaf mikið eftir í lokin. „Við lögðum bara mikla áherslu á það í vetur að taka mikinn lærdóm frá sumrinu 2012. Ég held að það hafi hjálpað okkur mjög mikið og eigi líka eftir að hjálpa okkur í framtíðinni,“ sagði Baldur.

Baldur gaf tóninn strax í byrjun móts með því að skora fjögur mörk í fyrstu fjórum leikjum KR-liðsins sem allir unnust. Gerði hann eitthvað annað í vetur en árin á undan? „Munurinn var kannski sá að ég hélst heill allt undirbúningstímabilið og í raun allt sumar. Ég lenti aldrei í neinum meiðslum ólíkt því sem hefur verið síðustu sumur,“ segir Baldur og bætir við:

„Þegar ég kom til KR í apríl 2009 kom ég inn með slæm ökklameiðsli og það tók mig langan tíma að ná mér af þeim. Á næstu árum á eftir var alltaf eitthvað og það gerðist alltaf á miðju undirbúningstímabili. Þá var maður alltaf að vinna sig í form á tímabilinu.“

Baldur segist eiga þjálfaranum Rúnari Kristinssyni mikið að þakka. „Ég er í rauninni að spila stöðuna hans því ég spila þarna í holunni. Hann setti mig þar um leið og hann tók við liðinu og ég hef bara haldið mig þar með örfáum undantekningum,“ segir Baldur og hann hefur notið góðs af þekkingu Rúnars á hans stöðu.

„Hann hefur skólað mig mikið til en það leiðinlegasta í þessu er að ég get aldrei gert allt sem hann biður mig um því hann var svo góður sjálfur,“ segir Baldur. Það hlýtur að vera eitthvað sem hann gerir betur en Rúnar? „Ég veit það nú ekki en hann kunni allavega ekkert að skalla,“ svarar Baldur hlæjandi.

Baldur segir hungrið í titla bara aukast við það að vinna og hann ætlar sér að standa sig vel og hjálpa KR að halda sér á toppnum. Baldur segir hins vegar að atvinnumennskan komi ekki til greina. „Ég fékk að prófa atvinnumennsku á sínum tíma en ég held að þeim kafla hjá mér sé lokið,“ segir Baldur og bendir á að hann hafi kannski spilað undir minni pressu vegna þessa.

Skólinn og fjölskyldan

„Þegar maður var ungur lá þetta alltaf í hausnum. Ég held að það hafi bara hjálpað mér í spilamennskunni í sumar að ég var ekkert að pæla í atvinnumennsku og vildi bara standa mig sem best hér hjá KR. Nú er maður bara að klára skólann og er kominn með fjölskyldu. Ég vil bara einbeita mér að lífinu hér og er virkilega sáttur í KR. Ég vil bara gera eins vel og ég get fyrir KR á meðan ég fæ nýjan samning hjá þeim,“ segir Baldur.

Besti leikmaður Pepsi-deildar karla 2013(Lágmarkið er einkunn í 14 leikjum af 22)

1    Baldur Sigurðsson    KR    6,55

2    Björn Daníel Sverrisson     FH    6,48

3    Haukur Páll Sigurðsson    Valur    6,44

4    Guðmann Þórisson    FH    6,41

5    Viðar Örn Kjartansson    Fylkir    6,41

6    Einar Hjörleifsson    Víkingur Ó.    6,39

7    Halldór Orri Björnsson    Stjarnan    6,38

8    Óskar Örn Hauksson    KR    6,36

9    Atli Viðar Björnsson    FH    6,27

10    Sverrir Ingi Ingason    Breiðablik    6,24



11    Abdel-Farid Zato-Arouna    Víkingur Ó.    6,18

12    Sam Tillen    FH    6,15

13    Eiður Aron Sigurbjörnsson    ÍBV    6,14

14    Brynjar Gauti Guðjónsson    ÍBV    6,14

15    Guðmundur Reynir Gunnarsson    KR    6,11

16    Finnur Orri Margeirsson    Breiðablik    6,10

17    Almarr Ormarsson    Fram    6,05

18    Jónas Guðni Sævarsson    KR    6,05

18    Kristinn Jónsson    Breiðablik    6,05

18    Mark Tubæk    Þór Ak.    6,05



21    Víðir Þorvarðarson    ÍBV    6,05

22    Róbert Örn Óskarsson    FH    6,00

22    Atli Jóhannsson    Stjarnan    6,00

22    David James    ÍBV    6,00

25    Daníel Laxdal    Stjarnan    5,95

25    Gary Martin    KR    5,95

27    Samuel Hewson    Fram    5,95

28    Ingvar Jónsson    Stjarnan    5,95

28    Arnór Ingvi Traustason    Keflavík    5,95

30    Chukwudi Chijindu     Þór Ak.    5,94



31    Brynjar Ásgeir Guðmundsson    FH    5,94

32    Arnór Eyvar Ólafsson    ÍBV    5,91

32    Ögmundur Kristinsson    Fram    5,91

32    Grétar Sigfinnur Sigurðsson    KR    5,91

35    Tonny Mawejje    ÍBV    5,90

35    Andri Rafn Yeoman    Breiðablik    5,90

35    Jóhann Laxdal    Stjarnan    5,90

38    Fjalar Þorgeirsson    Valur    5,89

39    Bjarni Guðjónsson    KR    5,89

40    Freyr Bjarnason    FH    5,88



41    Guðjón Pétur Lýðsson    Breiðablik    5,85

41    Hólmbert Aron Friðjónsson     Fram    5,85

41    Atli Guðnason    FH    5,85

44    Michael Præst    Stjarnan    5,84

45    Jóhann Helgi Hannesson    Þór Ak.    5,82

46    Magnús Már Lúðvíksson    Valur    5,82

47    Hannes Þór Halldórsson    KR    5,80

47    Brynjar Björn Gunnarsson    KR    5,80

47    Insa Bohigues Fransisco     Víkingur Ó.    5,80

50    Kristján Hauksson      Fylkir    5,79