Ekkert þokast í deilu geislafræðinga og LHS

Engin lausn er enn í sjónmáli í kjaradeilu geislafræðinga og Landspítalans - háskólasjúkrahúss (LHS), en á fimmtudaginn í næstu viku munu uppsagnir tveggja af hverjum þremur geislafræðinga við sjúkrahúsið taka gildi ef ekki næst saman.

Á fundi í dag voru geislafræðingar beðnir um að haga störfum sínum, ef til uppsagnanna kemur, líkt og um verkfall sé að ræða.

„Það á ekki við því að fólkið hefur sagt upp og er hætt,“ segir Katrín Sigurðardóttir, formaður Félags íslenskra geislafræðinga, í samtali við Fréttablaðið. Aðspurð segir hún að henni þyki ólíklegt að hennar félagsmenn muni ganga að því.

„Ég fæ mjög hörð viðbrögð frá þeim sem ég hef talað við, um að þetta sé ekki kostur í stöðunni.“

Hún segir ekkert hafa komið fram sem gefi von til þess að úr leysist.

„Það hefur ekkert nýtt komið fram í stöðunni til lausnar málsins.“

Katrín telur þó að eitthvað þurfi að fara að gerast á næstu dögum.

„Það er alveg ljóst. Þegar málin hafa þróast þannig að nánast heil starfsstétt getur ekki hugsað sér lengur að starfa á stofnuninni, þá hlýtur eitthvað að þurfa að gerast. Okkar starf er ríkur þáttur í því sem þarna fer fram og án þessara starfsmanna er ekki hægt að reka þessa stofnun. Það þarf að leysa málið og það gengur ekki að ætla að reka sjúkrahúsið til lengri tíma á neyðarúrræðum. “

Jón Hilmar Friðriksson, staðgengill forstjóra Landspítalans, segist bjartsýnn um að úr leysist áður en til uppsagnanna kemur.

„Já, sögulega hafa flestar svona deilur leystst, sem betur fer, margar þó á lokametrunum.“

Jón Hilmar segir neyðaráætlun spítalans vegna uppsagnanna verða kynnta í næstu viku, og samkvæmt henni ætti að vera hægt að sinna brýnustu tilfellum um stundarsakir.

„En aðaláherslan er auðvitað lögð á að leysa málið, svo ekki þurfi að grípa til neyðaráætlana,“ segir hann. 

Boðað hefur verið til fundar á morgun, föstudag, þar sem geislafræðingar munu svara beiðni spítalans, en næstkomandi þriðjudag munu geislafræðingar funda með velferðarráðherra.