Formaður Félags hjúkrunarfræðinga bjartsýnn á lausn

Fulltrúar hjúkrunarfræðinga hafa í dag fundað með fulltrúum Landspítalans og segir Elsa B. Friðfinnsdóttir, formaður félags hjúkrunarfræðinga vongóð um að lausn finnist á málinu. Hún segir í raun megi segja að frá hruni hafi hjúkrunarfræðingar unnið launalaust í eitt ár.

Eftir fund samninganefndar hjúkrunarfræðinga með ráðherrum í gær var ákveðið að hjúkrunarfræðingar settust aftur að samningaborði með fulltrúum Landspítalans. Samningaumleitanir hófust því aftur um klukkan sex í gær en um klukkan átta var ákveðið að fresta fundi til dagsins í dag og um leið að framlengja frest hjúkrunafræðinga til að draga uppsagnir sínar til baka um tvo sólarhringa.

Um hálf tíu í morgun hittust hjúkrunarfræðingar og fulltrúar Landspítalans svo aftur. Elsa B. Friðfinnsdóttir, formaður Félags hjúkrunarfræðinga, segir að skriður sé kominn á málið og vonast hún eftir að lausn finnist síðar í dag en um 280 hjúkrunfræðingar hafi sagt upp starfi sínu vegna óánægju með kjör.

Elsa segir forstjóra spítalans oft sinnis hafa sagt frá þeirri staðreynd að frá árinu 2007 hafi sparnaður í rekstri spítalans numið 32 milljörðum króna eða sem nemur heilu starfsári spítalans.