Með föðurímynd til að leysa deilumálin

„Við vorum alveg hættir að gefa út lög og hættir að leggja okkur fram en nú erum við komnir aftur af fullum krafti og stefnum á að gera þetta af alvöru,“ segir veðurguðinn Ingólfur Þórarinsson.

Hljómsveitin Veðurguðirnir hefur farið hljótt síðustu ár og til að mynda ekki gefið út nýtt efni frá því árið 2009. „Ég tók smá egótripp og ákvað að gefa út sólóplötu árið 2011. Ég hafði hugsað með mér að þar sem ég samdi öll lög Veðurguðanna þá gæti ég alveg eins gert þetta allt sjálfur. Platan seldist nú ekki mikið og ég áttaði mig á að það er miklu betra og skemmtilegra að gera þetta með hópnum. Þar hef ég betra aðhald og er umkringdur klárum strákum sem allir hafa sína skoðun á hlutunum og mynda betri heildarmynd,“ segir Ingó. Frá því að Veðurguðirnir gáfu út plötuna Góðar stundir árið 2009 hafa orðið tvær breytingar á hópnum.

Árið 2010 tók Óskar Þormarsson við trommukjuðunum af Valgeiri Þorsteinssyni og nú nýlega bættist hljómborðsleikarinn Einar Örn Jónsson í sveitina, en hann var lengi vel hluti af hljómsveitinni Í svörtum fötum. „Einar er hálfgerður faðir hópsins því hann er langelstur af okkur. Við berum föðurlega virðingu fyrir honum svo hann lendir stundum í því að þurfa að taka ákvarðanir, leysa deilumál og svoleiðis. Þetta er eins og í bandarískri fönkhljómsveit þar sem er alltaf einn gamall karl á píanóinu,“ segir Ingó sposkur.

Ingólfur segir Veðurguðina að sjálfsögðu hafa þróast með árunum en þeirra svið sé þó enn popptónlist í léttari kantinum. „Það kom okkur á óvart hvað síðasta plata var vinsæl hjá krökkum. Við vonum að sú næsta verði blandaðri og höfði þá til eldri hópsins líka. Við höldum áfram að leggja áherslu á textana sem við viljum að segi sögu í bland við smá grín. Svo komum við með alvarlegri lög inn á milli,“ segir hann. Ingó mun ekki sitja einn að lagasmíðinni héðan af því Einar Örn er einnig lunkinn á því sviði. „Það er fínt að fá hann á móti mér. Þá myndast líka smá samkeppni okkar á milli, sem er auðvitað bara jákvætt,“ segir hann. „Við stefnum á að gefa út fullt af lögum á næstunni og gera skemmtilega hluti sem fólk hefur gaman af,“ bætir Ingólfur við að lokum.

tinnaros@frettabladid.is