Gæslan berskjölduð eftir bilun í TF-GNÁ

Björgunargeta Landhelgisgæslunnar er verulega skert eftir að alvarleg bilun kom upp í útkalli hjá TF-GNÁ á fimmtudag. Er nú aðeins ein þyrla til taks.

GNÁ var stödd um 20 sjómílur frá landi þegar bilunin kom upp og var þyrlunni þegar flogið til lands og nauðlent á túni við bæinn Kvísker í Öræfum.

Margoft hefur verið bent á hversu Gæslan er berskjölduð gagnvart skyndibilunum í björgunarþyrlunum, sem eru þrjár. TFLÍF er í reglubundinni skoðun og því er TF-SÝN eina þyrlan sem er til taks en hún er ekki eins vel búin tækjum og hinar þyrlurnar tvær.

Forsvarsmenn Gæslunnar hafa ítrekað bent á þörfina fyrir endurnýjun þyrluflotans. GNÁ og SÝN eru báðar leiguþyrlur; SÝN verður skilað í haust en GNÁ á næsta ári. Stefnir því allt í að aðeins verði ein þyrla, LÍF, í rekstri Landhelgisgæslunnar. Ásgrímur L. Ásgrímsson, framkvæmdastjóri aðgerðasviðs LSH, segir ástandið alvarlegt.

„Eins og almenningur í landinu þá lít ég svo á að þetta verði að vera í lagi. Við treystum mjög á þessi björgunartæki, það er krafa tímans. Ekki bara fyrir sjófarendur heldur fyrir okkur öll. Það er alvarlegt þegar þeirri þörf er ekki fullnægt,“ segir Ásgrímur.

Spurður hvað hann viti um framgang mála hjá stjórnvöldum um kaup eða leigu á þyrlum er svar Ásgríms skýrt: „Ég veit ekkert um það.“

Ásgrímur segir að áhöfn þyrlunnar hafi þurft að lenda við fyrsta tækifæri enda ljóst frá byrjun að bilunin var alvarleg. „Þegar þetta var skoðað eftir lendingu var málmsvarfi í olíu og það segir sig sjálft að þegar svo er getur verið stutt í að hlutir fari að festast,“ segir Ásgrímur.

Tekin hefur verið ákvörðun um að GNÁ verði á Kvískerjum fram yfir helgi en ekki er hægt að vinna að viðgerð þyrlunnar á staðnum. Talsvert verkefni er að flytja þyrluna til Reykjavíkur og voru blöðin tekin af þyrlunni í gær og þau send með flutningabíl til Reykjavíkur. Eftir að hafa metið stöðuna til hlítar var ákveðið að ljúka reglubundinni skoðun þyrlunnar LÍF hið fyrsta og að henni lokinni hefjist vinna við GNÁ.