Hundruð hrekjast úr námi vegna andlegra veikinda

Fjárhagsvandi og andleg veikindi eru með algengustu ástæðum sem nemar gefa upp vegna brottfalls úr framhaldsskóla. Áhugaleysi, námserfiðleikar, líkamleg veikindi og flutningar yfir í annan skóla er einnig oft nefnt.

Skráðir nemendur á framhaldsskólastigi árið 2011 voru ríflega 28 þúsund alls, samkvæmt tölum Hagstofu Íslands. Á sama tíma er kvíði, þunglyndi og andleg veikindi nefnd sem ástæða brottfalls í um níu prósentum tilfella. Því liggur ljóst fyrir að andleg veikindi skýra brottfall hundruð nemenda á hverjum tíma.

Framhaldsskólum ber skylda til að halda utan um ástæður brottfalls, en Fréttablaðið skoðaði yfirlit frá Menntaskólanum í Kópavogi, Fjölbrautaskólanum í Breiðholti og Fjölbraut við Ármúla (FÁ). Nokkrir framhaldsskólar vildu ekki gefa upp ástæður brottfalls.

Ólafur H. Sigurjónsson, aðstoðarskólameistari við FÁ, segir þróunina áhyggjuefni. Brottfallið þar hafi aukist á síðustu árum.

„Við höfðum ekki áhyggjur af þessu fyrir hrun því krakkarnir gátu fengið vinnu og svo komu þau mörg hver seinna inn. En þetta er hópurinn sem er fyrst sagt upp þegar verið er að draga saman.“

Hlutfallið hefur haldist í kringum 30% síðasta áratug og töluvert hærra en á hinum Norðurlöndunum. Í skýrslu OECD um stöðu menntamála er sett fram gagnrýni á íslenskt menntakerfi þar sem brottfallið hér er yfir meðaltali.

Í BA-ritgerð Þorbjargar Guðjónsdóttur við Háskóla Íslands frá 2012, Brotthvarf úr framhaldsskóla, segir að fyrri námsárangur hafi mikið forspárgildi um brotthvarf. Fjölskyldur og foreldrar séu einnig stór áhrifaþáttur en stuðningur og menntun foreldra hafi einnig áhrif.