Alþingi spjaldtölvuvætt og fatareglur útskýrðar fyrir nýjum þingmönnum

„Nýir þingmenn fá tölvur og með nýju kjörtímabili ætlum við að hefja pappírslaus nefndarstörf, þannig þeir nota iPad á fundum,“ sagði Helgi Bernódusson, skrifstofustjóri Alþingis í viðtali við Reykjavík Síðdegis í gær, en nú er komið að því að tölvuvæða þingið á kostnað pappírsins. „Við erum ekki endilega að spara pappírinn,“ útskýrir Helgi, „heldur erum við að spara umfangið og vinnuna við að fjölfalda og útbúa gögn.“

Nú þurfa nýir þingmenn að læra flókna siði Alþingis. Helgi segir aðspurður að þetta sé nú ekki beinlínis stjórnmálaskóli Alþingis, „þetta hefur nú ekki svo fínan titil, við köllum þetta bara kynningarfund,“ segir Helgi en bráðlega útskýrt fyrir nýkjörnum þingmönnum, sem eru um 40 prósent Alþingis, umdeildar reglur um klæðaburð og fleira, svo sem bílastæði og hvert þeir eiga að senda skattkortin sín.

Aðspurður hvort það sé í lagi að vera í gallabuxum á Alþingi svarar Helgi ekki afdráttarlaust heldur útskýrir hann að það sé ætlast til þess að karlmenn séu í jakka og taubuxum. „Það er þó erfiðara að setja reglur um klæðaburð varðandi konur,“ segir Helgi en svo virðist sem konur hafi meira rými til þess að klæða sig frjálslega í þingsal. Helgi segir að þetta snúist fyrst og fremst um að sýna Alþingi og samstarfsmönnum virðingu.

Spurður um tækniframfarir á Alþingi bendir Helgi á að Ísland hafi verið eitt af fyrstu löndunum í heiminum sem fór að sýna beint frá þjóðþingi sínu. Þá hafi þingið tekið upp rafrænar atkvæðagreiðslur fyrir um 20 árum síðan. Nú er þó komin tími á næstu byltingu, þingið verður spjaldtölvuvætt til þess að spara vinnu og pappír. Að auki er þess krafist að öll gögn sem berast þinginu séu einnig á rafrænu formi.

Hægt er að hlusta á fróðlegt viðtal við Helga hér fyrir ofan.