Tæpur þriðjungur undirskrifta frá Reykvíkingum

Rétt rúmlega 20 þúsund Reykvíkingar skrifuðu undir á síðuna lending.is, Hjartað slær í Vatnsmýrinni.

Að sögn Njáls Trausta Friðbertssonar, formanns undirskriftarsöfnunarinnar höfðu 20.626 Reykvíkingar skrifað undir en um tvö prósent þeirra eru yngri en 18 ára og hafa því ekki náð löglegum kosningaaldri.

Samkvæmt upplýsingum frá Hagstofu Íslands voru tæplega 88 þúsund manns á kjörskrá í Reykjavík árið 2009, engar nýrri tölur er að finna á síðunni.

En ef miðað er við þær tölur má ætla að tæplega 23 prósent kosningabærra Reykvíkinga hafi skrifað undir til þess að mótmæla flutningi flugvallarins.

Það þarf að fara yfir allar tölur og athugasemdir

Dagur B. Eggertsson borgarfulltrúi Samfylkingarinnar segir að það eigi eftir að fara yfir undirskriftirnar, skoða aldur og annað. Hann segir að heildarfjöldi þeirra sem skrifuðu undir sé mikill og hann beri virðingu fyrir söfnuninni. Hann áréttar að tekið verði við öllum athugasemdum og farið verði málaefnalega yfir allar athugasemdir sem berast.

„Við höfðum skilið að um helmingur þeirra sem skrifuðu undir á síðunni væru Reykvíkingar en samkvæmt þessum tölum sem við fengum í morgun virðist það ekki vera raunin,“ segir Dagur.

Gísli Marteinn Baldursson borgarfulltrúi Sjálfstæðisflokksins, segir að þetta hafi að mörgu leyti verið vel heppnuð undirskriftasöfnun.

„Mér hefur alltaf þótt sjálfsagt að þeir sem vilji ekki flytja flugvöllinn láti skoðanir sínar í ljós. Ég ímynda mér að undirskriftirnar frá Reykvíkingum verði teknar eins og athugasemdir við skipulag og fái eðlilega málsmeðferð eins og aðrar slíkar athugasemdir,“ segir Gísli Marteinn.

Hann segir það ekkert athugavert að fólk í öðrum sveitarfélögum hafi skoðun á málinu og tjái hana. Það hljóti þó allir að sjá að það sé Reykjavík sem fer með skipulagsvaldið. Reykvíkingar hljóti að hafa meira um skipulagsmál borgarinnar að segja en utanbæjarmenn.

„Einhverjir höfðu sagt að það næðust hundrað þúsund undirskriftir og ég bjóst sjálfur alveg eins við því, þó það hafi að lokum ekki farið svo hátt, en þetta er mikill fjöldi og við munum fara yfir málið með opnum hug,“ segir Gísli Marteinn.

Hann segir að það hafi ekki komið sér á óvart að það væru ekki fleiri Reykvíkingar en raun bar vitni sem skrifuðu undir enda sé mikið af borgarbúum og sérstaklega unga fólkið í borginni sem vilji fá byggð í Vatnsmýrinni.