Erilsöm nótt á Akureyri

Mjög erilsamt var hjá lögreglunni á Akureyri í nótt en mikill fjöldi fólks er staddur í bænum vegna Bíladaga sem þar fóru fram um helgina.

Fimm gistu fangageymslur. Þrjár líkamsárásir voru gerðar en ekki var beitt vopnum og enginn slasaðist alvarlega. Mikið var um umferðarlagabrot af ýmsu tagi; margir óku of hratt og töluvert ónæði hlaust af spóli í bænum. Fjórir voru teknir fyrir akstur undir áhrifum, þrír þeirra höfðu neytt fíkniefna. Þá voru höfð afskipti af 13 ára dreng sem staddur var í bænum í óleyfi. Lögreglan kveðst vera vel mönnuð en vonast til að heimamenn og gestir sýni betri hegðun það sem eftir er helgar.