Héraðsskólinn á Laugarvatni fær nýtt hlutverk

Héraðsskólahúsið á Laugarvatni er merkilegt fyrir margar sakir. Arkitektinn Guðjón Samúelsson teiknaði það, þar skrifaði Halldór Laxness bókina Sjálfstætt fólk og þar var líka stjórnarsáttmálinn undirritaður í vor. Tveir félagar hafa tekið húsið á leigu af ríkinu næstu árin og opna á morgun hostel, veitingastað með léttum veitingum og upplýsingamiðstöð fyrir ferðaþjónustu. „Það sem við sjáum fyrir okkur er að við getum eflt allt svæðið, fengið alla með okkur, selt vörur hérna úr sveitinni og hjálpað ferðamönnum að fá upplýsingar um þjónustu sem er á svæðinu,“ segir Sveinn Pálsson, annar tvímenninganna.

Markmiðið er að leyfa sögu hússins að njóta sín en farið var í umtalsverðar framkvæmdir og enn er töluvert eftir. Til að byrja með verða 72 rúm í boði en þeim fjölgar í um 120 næsta sumar. Húsið er næstum 1600 fermetrar og segja þeir félagar vini og vandamenn ásamt heimamönnum á svæðinu hafa reynst afar hjálplega. Kvistur hússins og ytra útlit er friðað en arkitektafyrirtækið Marey sá um hönnunarvinnu í kringum breytingarnar. Þá kom ráðgjafafyrirtækið Iceland REPS að undirbúningnum. Þeir félagar fjármagna verkefnið sjálfir. „Við fórum í sparibaukana okkar og hristum þá allrækilega,“ segir Sverrir Steinn Sverrisson.

Stefnt er að heilsársrekstri og margs konar uppákomur eru í bígerð, t.d. brúðkaup og hjólreiðamót. Upplýsingaþjónusta fyrir ferðamenn mun byggja á hugbúnaðarkerfi sem þeir félagar hafa þróað í samstarfi við Bókun ehf. og verður netsíðan icelandonsale.com opnuð fljótlega. „Þetta er í raun svona alhliða bókunarþjónusta fyrir afþreyingu, gistingu, bílaleigu og veitingastaði,“ segir Sverrir. Hann hefur viss tengsl við þetta sögufræga hús. „Skólinn var stofnaður 1928 og afi minn heitinn Ólafur Þorláksson var hérna 1929 til 1931 ef ég man rétt, náði sér í ömmu hérna, Helgu Eysteinsdóttur. Bróðir hans var hérna reyndar líka sem náði sér í systur hennar ömmu, byggðu sér bæ hlið við hlið við Hraun í Ölfusi og lifðu sæl og hamingjusöm.“