Nemendur vinni fyrir fyrirtæki

Efla á tengsl skóla og atvinnulífs með framtakinu Verkefnamiðlun, sem Íslenski sjávarklasinn stendur að. Opnaður hefur verið vefurinn verkefnamidlun.is, en þar geta fyrirtæki skráð verkefni sem þau óska eftir nemendum til að sinna. Þegar eru í boði um 50 verkefni af ýmsu tagi.

Þór Sigfússon, framkvæmdastjóri Íslenska sjávarklasans, segir með framtakinu brugðist við áhuga bæði skóla og atvinnulífsins á að bæta tengsl þar á milli.

Fyrsta kastið er áhersla lögð á verkefni tengd hafinu og nýsköpun en vefurinn er þó opinn fyrirtækjum í öllum atvinnugreinum.

„Ég hvet nemendur alveg sérstaklega til að skrá sig þarna inn á vefinn,“ segir Þór og kveðst vonast til þess að á endanum verði þarna til ein verkefnamiðlun fyrir atvinnulífið allt.

Hann segir verkefnið hafa verið kynnt í norrænu samstarfi og mikill áhugi sé fyrir því bæði í Færeyjum og Danmörku að setja upp verkefni með það sem fyrirmynd. „Þeir hafa óskað eftir hugbúnaðarfyrirtækjunum sem hafa aðstoðað okkur hér heima.“

Verkefnið verður kynnt nemendum formlega á morgun á Framadögum sem haldnir verða í Háskólanum í Reykjavík.