Brot telst fullframið þótt níðingur hitti aldrei barnið

Nokkur mál eru til rannsóknar hjá kynferðisbrotadeild lögreglu þar sem skoðað er hvort menn hafi brotið gegn nýju ákvæði í hegningarlögum um tælingu barna í gegn um netið. Samkvæmt ákvæðinu telst brot fullframið þó níðingur hitti aldrei barnið.

Alþjóðlegur netöryggisdagur var haldinn í dag og af því tilefni stóð SAFT fyrir málþingi um stefnumótum á netinu. Meðal þeirra sem þar tóku til máls var rannsóknarlögreglumaður á kynferðis- og ofbeldisbrotasviði lögreglunnar á höfuðborgarsvæðinu sem segir ýmsar hættur leynast á netinu fyrir börn.

Rannsóknarlögreglumaðurinn Einar Guðberg Jónsson vekur athygli á því að þegar kynferðisbrotakafli hegningarlaga var endurskoðaður á síðasta ári, kom þar inn ákvæði þar sem segir að „Hver sem með samskiptum á netinu, annarri upplýsinga- eða fjarskiptatækni, eða með öðrum hætti, mælir sér mót við barn yngra en 15 ára, í því skyni að hafa við barnið samræði eða önnur kynferðismök, eða til að áreita það kynferðislega á annan hátt, skal sæta fangelsi allt að 2 árum."

Lögreglan fékk með þessu ákvæði auknar heimildir til að koma böndum yfir kynferðisbrotamenn.