Ekki búið að ákveða hvort sýknudómi verði áfrýjað

Ríkissaksóknari hefur ekki tekið ákvörðun um það hvort að sýknudómi yfir Styrmi Þór Bragasyni, fyrrum forstjóra MP banka, verði áfrýjað til Hæstaréttar. Áfrýjunarfrestur í málinu rennur út 28. febrúar næstkomandi.

Styrmir Þór var ákærður vegna svokallaðrar Exeter-fléttu. Í Héraðsdómi Reykjavíkur á fimmtudaginn var hann hinsvegar sýknaður og féll allur málskostnaður á ríkissjóð. Hann sagði eftir dóminn að hann hefði aldrei skilið ákæruna og niðurstaðan dómsins hafi verið í takt við það sem hann bjóst við. Þrjú og hálft ár af hans lífi hafi farið í þetta mál.

Málið snerist um 1100 milljóna króna lán sem Byr veitti Exeter Holding á seinni hluta ársins 2008. Lánið var notað til þess að kaupa stofnfjárbréf af MP banka og tveimur stjórnarmönnum Byrs á yfirverði. Tveir menn, þeir Jón Þorsteinn Jónsson og Ragnar Z. Guðjónsson, höfðu áður hlotið fjögurra og hálfs árs fangelsisdóm fyrir sinn þátt í málinu.