12.300 í atvinnuleit í apríl

Atvinnuleysi var 6,6 prósent í apríl samkvæmt vinnumarkaðsrannsókn Hagstofunnar, sem segir að í mánuðinum hafi 12.300 verið án vinnu. Á sama tíma var skráð atvinnuleysi 4,9 prósent samkvæmt mælingu Vinnumálastofnunar, sem segir að í mánuðinum hafi 7.998 að meðaltali verið atvinnulausir.

Samkvæmt tölum Hagstofunnar voru í apríl að jafnaði 186.800 manns á vinnumarkaði og atvinnuþátttaka 82,3 prósent. Hagstofan birti um leið árstíðarleiðréttar tölur sem eiga að gera samanburð milli mánaða raunhæfari og segja betur til um almenna þróun á vinnumarkaði. Samkvæmt þeim voru 185.200 á vinnumarkaði í apríl og atvinnuþátttaka 80,8 prósent. Árstíðaleiðrétt atvinnuleysi er líka heldur minna, eða 5,8 prósent.

Í umfjöllun Greiningar Íslandsbanka kemur fram að sé tekið mið af fyrsta þriðjungi ársins hafi skráð atvinnuleysi að jafnaði mælst 5,3 prósent, samanborið við 7,0 prósent á sama tíma í fyrra og 8,4 prósent árið þar á undan. Samkvæmt mælingu Hagstofunnar hafi atvinnuleysi hins vegar að jafnaði verið 6,0 prósent fyrstu fjóra mánuði ársins, 7,3 prósent í fyrra og 8,3 prósent árið þar á undan.

„Hefur því verulega dregið úr atvinnuleysi á milli ára, og benda þessar tölur til þess að staðan á vinnumarkaði hafi batnað töluvert,“ segir í umfjöllun Greiningar.

„Þó ber að halda til haga áhrifunum af bráðabirgðaákvæðinu sem gerði atvinnuleitendum kleift að fá greiddar atvinnuleysistryggingar í allt að fjögur ár. Það rann út um síðustu áramót og hefur skráð atvinnuleysi af þeim sökum mælst nokkuð minna á þessu ári.“

Bent er á að áhrifa þessa gæti ekki í vinnumarkaðsrannsókn Hagstofunnar. „Gera má ráð fyrir að skráð atvinnuleysi minnki nær stöðugt til og með september næstkomandi,“ segir í umfjöllun Greiningar og bent á að almennt minnki skráð atvinnuleysi á milli apríl og maí. Þannig hafi atvinnuleysi þá mánuði í fyrra farið úr 6,5 prósentum í 5,6 prósent.

„Þess má geta að þróun atvinnuleysis samkvæmt vinnumarkaðsrannsókn Hagstofunnar er almennt með allt öðrum hætti á milli þessara sömu mánaða. Þannig eykst atvinnuleysi almennt samkvæmt Hagstofunni á milli apríl og maí, en sú aukning er árstíðarbundin og tengist skólalokum, og táknar því ekki að ástandið á vinnumarkaði sé eitthvað verra.“olikr@frettabladid.is