Brottnumda telpan sögð einstök hetja

„Þetta er algjör hetja. Það verður bara að segjast að þetta er einstök stúlka,“ segir María Júlía Rúnarsdóttir, fulltrúi réttargæslumanns stúlkunnar sem numin var á brott með valdi í Vesturbænum í síðustu viku og beitt kynferðislegu ofbeldi. Aðspurð um líðan stúlkunnar segir María hana vera eftir atvikum.

„Maður getur bara ímyndað sér hvernig það er. Það er held ég aðalatriðið að lifa sem eðlilegustu lífi eins og hægt er eftir svona atburð. En hún fær alla þá hjálp sem í boði er.“

Tekin var skýrsla af stúlkunni í Barnahúsi síðastliðinn föstudag. „Hún stóð sig alveg ótrúlega vel eftir atvikum. Þetta er auðvitað erfitt en hún stóð sig bara prýðilega og gat sagt skilmerkilega frá,“ segir Helga. 

Dómari var viðstaddur skýrslutökuna í Barnahúsi og mun stúlkan ekki þurfa að mæta frekar í skýrslutöku vegna málsins. 

„Þegar um barn er að ræða er bara gefin skýrsla einu sinni. Ef málið fer fyrir dóm er dómari sem fer með málið viðstaddur skýrslutöku í Barnahúsi.“ 

Aðkomu stúlkunnar að málinu er því lokið en lögð verður fram bótakrafa fyrir hennar hönd sem verður þá hluti af aðalmeðferð málsins fari það fyrir dóm. Björgvin Björgvinsson, aðstoðaryfirlögregluþjónn hjá lögreglunni á höfuðborgarsvæðinu, segir rannsókn málsins miða vel og að framburður stúlkunnar í Barnahúsi hafa varpað skýrara ljósi á þá atburðarás sem átti sér stað. 

„Framburður hennar var mjög skýr og greinargóður og hjálpaði til við að skýra atburðarásina.“ Samkvæmt heimildum verður maðurinn yfirheyrður af lögreglu í dag. Lögreglan rannsakar nú hvort maðurinn sem er í haldi tengist öðrum málum þar sem reynt var að lokka börn upp í bíl. 

Björgvin segir ekkert liggja fyrir um hvort sú sé raunin. Hann segir að tenging málanna sé byggð á lýsingu á bíl og geranda. „Það hefur ekkert komið fram en það er verið athuga tiltölulega mörg mál og rannsókn á þeim er ekki lokið.“ Aðspurður segir hann að ekki hafi verið talin ástæða til að fara fram á að gert yrði geðmat á manninum.hanna@frettabladid.is