Barnaklámsíðu enn haldið úti

Barnaklámssíðu, sem lögreglan hér á landi hélt að væri búið að loka, er enn haldið úti en þar er að finna fjölda mynda af ólögráða íslenskum stúlkum.

Ungur íslenskur tölvuhakkari komst inn á alþjóðlega vefsíðu sem falin er venjulegum tölvunotendum en á henni er að finna heilan helling af barnaklámi og mörg hundruð tengla á aðrar barnaklámssíður.

„Það eru íslenskar stelpur á þessum síðum og íslenskir notendur. Notendanöfn sem maður hefur séð á síðum þar sem menn tala íslensku eru komin þarna inn. Það er bara ógnvænlegt hvað þetta er stórt," segir tölvuhakkarinn í fréttaskýringarþættinum Málinu sem sýndur er á Skjá einum í kvöld.

Hakkarinn segir Íslendinga bæði hlaða niður ólöglegu efni af síðunni en einnig setji þeir sjálfir inn myndir á síðuna. Hann telur yngstu stelpurnar vera tólf til þrettán ára gamlar.

„Ég er með staðfestingu á því. Ég veit um stelpur þarna sem eru þrettán ára. Margar þeirra eru nafngreindar. Oft fylgja full nöfn með myndunum," segir tölvuhakkarinn.

Ein af síðunum, sem hefur að geyma myndir af íslenskum stúlkum, var í rannsókn hjá lögreglunni hér á landi fyrir nokkrum mánuðum en talið var að henni hefði verið lokað.

Ítarlega er fjallað um þetta í fréttaskýringarþættinum Málinu sem sýndur er á Skjá einum í kvöld.