Líkaminn refsar þér ef þú notar skyndilausnir

Ragnhildur Þórðardóttir, heilsusálfræðingur og einkaþjálfari, eða Ragga nagli eins og flestir þekkja hana, er búsett í Danmörku en þjálfar engu að síður fjöldann allan af Íslendingum í gegnum netið.

Hún skrifar víða pistla og dreifir flottum fróðleik um heilsu, æfingar og mataræði. Ragga segir líkamann hefna sín ef maður þröngvar upp á hann dramatískum aðgerðum.

Ráð Röggu ti að koma sér í form fyrir sumarið eftir páskagleðina

Hegðunarmarkmið

Settu þér hegðunarmarkmið frekar en að einblína eingöngu á útkomumarkmið. Versla hollt, minnka skammtana, sleppa gosdrykkjum og mæta á allar æfingar vikunnar. Það eru þessar uppsöfnuðu litlu breytingar á hegðun sem verða að lífsstíl.

Gerðu samning

Til að koma hegðun upp í vana þarf að framkvæma hana í 20-30 daga án þess að svindla. Gerðu samning við sjálfa(n) þig að mæta þrisvar í viku fyrsta mánuðinn – það eiga allir þrjá klukkutíma aflögu á viku.

Heilbrigð efnaskipti

Markmiðið í fitutapi á alltaf að vera að halda heilbrigðum efnaskiptum. Byrjaðu með kaloríur eins hátt og eins fáar þolæfingar og þú kemst af með. Lyfta þungt til að viðhalda vöðvamassanum. Láttu styrktaræfingar vera í forgangi fremur en þolæfingar.

Mældu árangurinn

Byrjaðu í efri mörkum hitaeiningaþurrðar og mældu líkamlegar breytingar á tveggja til þriggja vikna fresti. Ef þú ert að ná árangri, haltu áfram á sömu braut. Ef ekkert er að gerast, gerðu smávægilegar breytingar.

Vigtin segir ekki allt

Ekki einblína á vigtina sem mælikvarða á árangur. Hún segir þér ekkert um hlutfall vöðva og fitu í samsetningu líkamans. Notaðu frekar þína eigin upplifun af árangri, fötin, málband, spegilinn.

Raunhæfar væntingar

Það þýðir ekki að byrja í apríl og ætla sér að verða helmassaköttaður í júní. Það tók ekki ársfjórðung að bæta á þig aukakílóunum – það mun því heldur ekki taka örfáar vikur að skafa þau af. Gefðu þér tíma í verkefnið. Því lengri tíma sem þú gefur þér í fitutap þá stuðlar það að langvarandi árangri.

Þolinmæði er besti ferðafélaginn

Leyfðu líkamanum að vinna á sínum hraða og mundu að góðir hlutir gerast hægt. Ekki detta í skyndilausnapakkann í epískri óþolinmæði eftir árangri. Ef þú gerir rétt fyrir líkamann vinnur hann með þér – ef þú þröngvar honum með dramatískum aðgerðum þá hefnir hann sín.

Viðhorfið skiptir máli

Stjórnaðu hugsunum þínum og lærðu á veikleika þína.

Lærðu á sjálfan þig

Ekki fara á enn eitt planið, kúrinn, æfingaprógrammið nema þú gerir vorhreingerningu í hausnum. Lærðu í hvaða aðstæðum þú kokkar upp afsakanir fyrir að fara af beinu brautinni. Vertu tilbúinn með mótrök og réttar aðferðir til að yfirstíga hindranir. Skrifaðu niður hvers vegna það skiptir þig máli að ná markmiðum þínum og dragðu upp þann minnismiða þegar hugsanir sem vilja vinna hryðjuverk á árangrinum læðast inn í kollinn á þér.



Uppskriftir: https://ragganagli.wordpress.com/uppskriftir-roggu-nagla/

Heilsupressan: https://www.pressan.is/pressupennar/Ragga_Nagli

Fjarþjálfun: https://ragganagli.wordpress.com/about/

Greinar: https://ragganagli.wordpress.com/greinar-roggu-nagla/