Tveir nýir sviðsforsetar ráðnir

Gengið var frá ráðningu tveggja nýrra sviðsforseta við Háskóla Íslands í dag. Jóhanna Einarsdóttir, prófessor í menntunarfræði við Háskóla Íslands og forstöðumaður Rannsóknastofu í menntunarfræðum ungra barna, hefur verið ráðin forseti Menntavísindasviðs. Daði Már Kristófersson, dósent í hagfræði og forstöðumaður þróunar- og samstarfsverkefna við Háskóla Íslands, var ráðinn í starf forseta Félagsvísindasviðs.  

Jóhanna Einarsdóttir lauk doktorsprófi í menntunarfræðum ungra barna árið 2000 frá Háskólanum í Illinois í Bandaríkjunum, M.Ed. námi 1977 og BS-prófi 1976 frá sama skóla.

Daði Már Kristófersson lauk doktorsprófi frá Norwegian University of Life Sciences árið 2005, meistaraprófi í auðlindahagfræði frá Landbúnaðarháskóla Noregs árið 2000 og B.Sc.-prófi í landbúnaðarfræðum frá Landbúnaðarháskóla Íslands árið 1997.