Foreldrar bregðast við tíðindum af broti gegn litlu stelpunni

Foreldrar barna í Vesturbæ ætla að óska eftir meiri sýnileika lögreglunnar þegar skóla lýkur. Þetta kemur fram í bréfi sem forystumenn foreldrafélaga skóla í Vesturbæ sendu foreldrum í morgun. „Hvatt er til aukinnar vitundar, fræðslu og þátttöku um hverfagæslu í Vesturbæ,“ segir í bréfinu. Tilefnið er fréttir af manni sem braut gegn ungri stúlku í Vesturbæ í fyrradag. Maðurinn var úrskurðaður í tveggja vikna gæsluvarðhald í gær.

Forystumenn foreldrafélaganna hvetja til þess að foreldrar ræði við börn sín um þessi mál. „Helst þarf að ræða málin á þann hátt að niðurstaðan verði ekki að börn vantreysti fullorðnum almennt. Vestubærinn er almennt talinn eitt öruggasta hverfi höfuðborgarsvæðisins. Hefur það m.a. komið fram á almennum upplýsingafundum lögreglu, í tölfræðigögnum o.s.frv. Hér iðar allt af lífi og mikil hreyfing er í kringum skólana, frístundaheimilin, KR, verslanirnar, sundlaugina, Háskólann, kirkjurnar, æfingasvæðin, róluvellina, á göngu- og hlaupastígum o.s.frv.," segir í bréfinu.

Í bréfinu segir að foreldrar muni hjálpast að, ásamt skólunum og samfélaginu öllu, þéttum raðirnar, stöndum saman og verðum enn betur vakandi. „Horfum í kringum okkur og tökum eftir hvort ekki er allt með felldu. Skipulögð samvinna okkar - þ.e. viðbragð heildarinnar - virkar sterkast," segir í bréfinu.

Í bréfinu segir líka að því miður sé ekki til handhægt og aðgengilegt upplýsingaefni fyrir foreldra um hvernig best sé að ræða við börn sín um mál sem þessi. Við hvetjum enn til þess að fagaðilar afli þessa efnis eða fái það útbúið.