Vændiskaupandi kærði sextán ára stúlku

Maður á höfuðborgarsvæðinu sem komst í kynni við 16 ára stúlku í gegnum stefnumótasíðuna Einkamál kærði hana til lögreglu eftir að hún stakk af með tuttugu þúsund krónur sem hann ætlaði að greiða henni fyrir kynlíf.

Stúlkan mælti sér mót við manninn og óskaði eftir að hann myndi rétta henni peningana í gegnum glugga á bíl hans. Eftir að maðurinn gerði það tók stúlkan til fótanna og stakk af með peninginn.

Vegna þessa kærði maðurinn stúlkuna fyrir fjársvik og gaf Lögreglustjórinn á höfuðborgarsvæðinu út ákæru á hendur stúlkunni.

Í úrskurði Héraðsdóms Reykjavíkur segir að úr ákærunni megi lesa að henni sé gefið að sök að hafa svikið manninn og ástæðan sé sú að hún efndi ekki kynlífsviðskiptin.

„Það er mat dómsins að vændiskaup viðsemjanda ákærðu, sem var barn að aldri, njóti ekki réttarverndar 248. gr. almennra hegningarlaga þótt um vændiskaupin hafi farið eins og lýst er í ákærunni. Vændiskaupandinn gat ekki vænst verndar refsivörslunnar þótt um viðskiptin hafi farið eins og lýst er í ákærunni. Önnur skýring á efni 248. gr. almennra hegningarlaga leiddi til þess að eini möguleiki ákærðu til að losna frá refsiábyrgð hafi verið sá að standa við kynlífsþjónustuna sem um ræðir. Að mati dómsins er sú niðurstaða ótæk.“

Sú ákvörðun Héraðsdóms að vísa málinu frá var síðan kærð til Hæstaréttar sem í dag vísaði málinu frá þar sem kæra saksóknara uppfyllti ekki skilyrði laga.