Höfða einkamál á hendur þjófum

IKEA á Íslandi hefur aukið öryggi í verslun sinni eftir að upp komst um langvarandi, stórfellt fjársvikamál í versluninni fyrr á árinu.

Samkvæmt framkvæmdastjóra IKEA, Þórarni Ævarssyni, hyggst IKEA einnig höfða einkamál á hendur þeim aðilum sem frömdu verknaðinn. Lögregla hefur enn ekki gefið út ákæru í málinu.

„Við höfum þurft að skerpa á öryggisráðstöfunum hjá fyrirtækinu. Sem dæmi má nefna að nú er alltaf öryggisvörður við kassann, en við höfum gripið til ýmissa annarra ráðstafana,“ segir Þórarinn.

„Ég er tregur að skipta skilareglunni út. Mér finnst dapurt að nokkrir óprúttnir aðilar verði til þess að við þurfum að breyta eða herða skilaregluna. Mér finnst sjálfsagt að hægt sé að skila vörum til okkar. Við höfum hugsað þetta fram og tilbaka, en niðurstaðan er alltaf sú að okkur finnst þetta sjálfsagður réttur neytenda,“

Talið er að brotin nái allt að sex ár aftur í tímann. Þau felast einkum í því að strikamerki á ódýrum vörum voru sett á dýrar vörur sem var síðan skilað fyrir inneignarnótur. Inneignarnóturnar voru svo notaðar til þess að kaupa vörur eða þeim breytt í gjafabréf sem auðvelt er að koma í verð.