Þetta getur þú gert til að koma í veg fyrir innbrot

Innbrotum á höfuðborgarsvæðinu hefur fækkað um tuttugu prósent það sem af er ári, miðað við saman tímabil í fyrra. Þrátt fyrir það má fólk ekki sofna á verðinum, sérstaklega nú þegar sumarið nær hámarki, segir Vilborg Magnúsdóttir sérfræðingur Sjóvar í forvörnum.

Tölur frá lögreglu sýna að innbrot á heimili eru ennþá algengustu brotin.

„Nú þegar sumarfrí eru að hefjast og við yfirgefum heimili okkar er áríðandi að hafa í huga  hvernig við getum komið í veg fyrir innbrot og skemmdarverk á heimilum okkar," segir hún.

Vilborg leggur áherslu á mikilvægi þess að ganga tryggilega frá gluggum og hurðum þegar farið er að heiman hvort sem það er til lengri eða skemmri tíma.

„Þetta eru ekki nýmæli en þau hafa sannað gildi sitt og hvers vegna ættum við að auðvelda ókunnugum aðgengi að heimilum okkar?. Það getur skipt sköpum  að vera vakandi fyrir umhverfinu og hjálpast við að vakta heimili hvers annars, leggja bílum í innkeyrslu nágrannans og setja rusl í ruslatunnurnar hans.   Margir huga ekki að frágangi lausra muna sem auðvelt er að stela  eins og grillum, kerrum og reiðhjólum. Eru hlutirnir í læstri geymslu, eða eru hjólin að minnsta kosti læst fyrir utan húsin?" segir Vilborg.

Sjóvá hefur tekið saman lista yfir nokkur atriði sem íbúar geta gert til að reyna koma í veg fyrir innbrot.

Hvað getur þú gert?

• Lokaðu gluggum þegar farið er að heiman, brýndu fyrir heimilisfólki að gera hið sama
  
  
• Læstu öllum hurðum
  
  
• Notaðu  öryggiskerfið ef það er til staðar og vertu viss um að það sé í lagi
  
  
• Geymdu verðmæti í herbergjum sem hafa öryggiskerfi
  
  
• Aldrei geyma lykla undir dyramottu eða blómapotti
  
  
• Gakktu tryggilega frá gluggum og hurðum
  
  
• Láttu nágrannann vita þegar farið er að heiman
  
  
• Skildu við gluggatjöldin eins og þú gerir venjulega
  
  
• Hafðu kveikt ljós í húsinu á áberandi stað
  
  
• Biddu nágrannann um að leggja bíl í stæðið þitt af og til og setja rusl í ruslatunnuna þína
  
  
• Biddu nágrannann um að tæma fyrir þig póstkassann eða ýta bréfum og blöðum inn um lúguna ef tilefni er til
  
  
• Skoðaðu þann möguleika að hafa símflutning yfir í farsíma þegar þú ert að heiman
  
  
• Slepptu því að auglýsa ferðina eða fríið á samfélagsmiðlum
  
  
• Geymdu ferðavagninn, kerrur og hjólhýsi  á upplýstu svæði en ekki fjarri umferð
  
  
• Segðu nágrannanum frá því að þú eigir ferðavagninn sem stendur innst í botnlanganum
  
  
• Ekki geyma verðmæti í bílnum þínum s.s. GPS tæki, veski, síma eða tölvur
  
  
• Settu upp nágrannavörslu í þinni götu eða fjölbýlishúsi
  
  
• Ef þú kemur heim og sérð að brotist hefur verið inn skaltu hringja strax í 112
  
  
• Ekki snerta á neinu fyrr en lögreglan hefur rannsakað húsnæðið, það gætu verið ummerki eftir þjófinn.