Útúrsnúningar og ódýr rök ráðherra

Undirskriftir gegn hækkun veiðigjöldum stefna hraðbyri í 30 þúsund á aðeins tæpum þremur sólarhringum. Þegar þetta er skrifað stendur söfnunin í 27,300 undirskriftum. Henni var hrundið af stað klukkan 17:00 17. júní. Steingrímur J. Sigfússon, fyrrverandi atvinnuvegaráðherra, telur viðbrögð sjávarútvegsráðherra við þeim einkennast af útúrsnúningum.

Sigurður Ingi Jóhannsson sjávarútvegsráðherra tjáði sig um undirskriftirnar í fréttum Stöðvar 2 í gær. Fjöldi undirskrifta kemur honum á óvart en hann segir ástæður fyrir því að breytingar á veiðileyfagjöldunum voru lagðar fram.

"Ef við hefðum ekkert gert þá yrðu engin veiðigjöld á næsta fiskveiðiári. Vegna þess að lögin, sem áttu að taka gildi 1. september næstkomandi, eru óframkvæmanleg," sagði Sigurður Ingi meðal annars.

Rökleysa og ódýr fyrirsláttur

Steingrímur J Sigfússon, fyrrverandi atvinnuvegaráðherra gefur lítið fyrir þessi svör, telur þau vart boðleg: "Þetta er algjörlega ofmælt og í raun fjarstæða. Það er vottur af sannleik í því að veiðigjaldanefndin hefur verið að reyna að ná samkomulagi við Hagstofuna og Skattinn við að geta sundurgreint betur tilteknar upplýsingar. En, það er líka hægt að leysa það með tiltölulega einfaldri lagabreytingu á veiðigjaldalögunum."

Þar fyrir utan eru það engin rök, að mati Steingríms, að þó að menn myndu velja að leggja veiðigjöldin á með bráðabirgðaákvæðum aftur segir það ekkert til um hvort að þurfi að lækka þau eða að þau eigi að vera óbreytt eða þess vegna hækka þau. "Það er afar ódýr afsökun. Í raun og veru er þetta útúrsnúningur. Það er alveg rétt, og við viðurkennum það, að veiðigjaldanefndin rak sig á ákveðin vandkvæði við að sundurgreina tilteknar upplýsingar til að treysta grunninn undir álagningunni. En ekkert útséð er með að það væri hægt að leysa með samkomulagi milli viðkomandi aðila; Fiskistofu, veiðigjaldanefndar, Hagstofunnar og Skattsins. Það var verið að vinna að því í ráðuneytinu."

Fjartæðukennd rök fyrir lækkun veiðigjalda

Steingrímur segir að til vara sé sú leið alltaf fær að gera þá einfalda breytingu á lögunum um veiðigjöld sem styrkja stöðu og rétt veiðigjaldanefndarinnar til að fá þessar sundurgreindu upplýsingar. "Í þriðja lagi, eins og ég segi, ef menn velja þann kost að leggja þetta á með bráðabirgðaákvæðum í föstum krónutölum á ígildi segir það ekkert til um það hvort gjöldin sem slík eigi að lækka, vera óbreytt eða þess vegna hækka. Þannig að það er algjör fjarstæða að nota þetta sem rök fyrir þessari miklu lækkun sem ríkisstjórnin er að leggja til."