Fimm ofurhugar ætla að hlaupa tíu ferðir á Esjuna

Esjuhlaupið, Mt. Esja Ultra, verður haldið í annað sinn á laugardaginn. Í fyrra hlupu samtals áttatíu manns í öllum vegalengdum, þar af fjórir sem fóru tíu ferðir. Í ár hafa fimm ofurhugar skráð sig í tíu ferðir.

Í tilkynningu segir að hægt sé að velja um fjórar mismunandi vegalengdir, Það er tvær, fimm eða tíu ferðir upp að Steini, en í ár bætist við sjö kílómetra hlaup.

Í fyrra var hlaupið kosið hlaup ársins á vefnum hlaup.is. Hlaupahaldarar búast við mikilli stemningu í fjallinu líkt og í fyrra en veðurspáin lofar frábæru hlaupaveðri, segir í tilkynningu.

Vertinn á Esjustofu, Pjetur Árnason, verður með grillið í gangi og mun sjá til þess að engir hlauparar né áhorfendur fari svangir eða þyrstir heim að hlaupi loknu.

Nánari upplýsingar á Facebook.