Mörg hundruð milljónir í vanrækslugjöld

Kjartan Hreinn Njálsson skrifar 29. júní 2013 19:37

Að meðaltali eru 35 þúsund álagningarseðlar afgreiddir árlega. mynd/vilhelm

Vanrækslugjald ökutækja hefur skilað milljón krónum í ríkiskassann daglega síðustu fjögur ár. Formaður FÍB óttast að mun fleiri ökutæki komist ekki í gegnum skoðun með hækkandi aldri bílaflotans.

Bílaflotinn á Íslandi er sá elsti í Evrópu. Fjöldi skráðra ökutækja hefur að mestu staðið í stað síðustu ár en þó að nokkur fjölgun hafi átt sér stað undanfarið. Alls eru þrjú hundruð og sjö þúsund ökutæki skráð á Íslandi í dag.

Um fjórðungur allra ökutækja kemst ekki í gegnum árlega skoðun og fær endurskoðun, eða um 24 til 25 prósent. Endurskoðunin segir þó ekki alla söguna, enda eru margir sem fresta því að mæta á skoðanastöðvar. Hérna kemur vanrækslugjaldið til kasta, heilar fimmtán þúsund krónur.

Vanrækslugjaldið hefur skilað einum komma þremur milljörðum króna í ríkiskassann frá árinu tvö þúsund og níu. Þetta jafngildir hátt í einni milljón króna fyrir hvern einasta dag ársins. Að meðaltali eru 35 þúsund álagningarseðlar afgreiddir árlega.

„Það liggur nokkuð ljóst fyrir að bílaflotinn er að eldast, viðhald bíla er afar dýrt. Þannig að það er nokkuð um það að menn séu að fresta viðhaldi. Þannig að ég geri ráð fyrir að það sé töluvert meira um endurskoðun núna en áður," segir Runólfur Ólafsson, framkvæmdastjóri Félags íslenskra bifreiðaeigenda.

„Auðvitað er umferðin okkar ekkert einkamál. Við erum þarna upp á náð og miskunn samborgara okkar, þannig að það er mjög æskilegt að bílar séu í góðu ástandi."

Fáir þekkja þennan veruleika jafn vel og sjálfir skoðanamennirnir. Þeir voru í óðaönn að sinna ökumönnum á síðasta snúning fyrir mánaðarmótin þegar fréttastofa hitti þá í Hafnarfirði.

„Já, við finnum fyrir því að bílaflotinn er að eldast," segir Bergur Helgason, framkvæmdastjóri Aðalskoðunar.„En það er kannski ekki hægt að segja að ástandið sé að verða mikið verra, en menn eru vissuleg að halda gömlu bílunum lengur í gangi."

„Það er síðasti dagur mánaðarins og þá er alltaf nóg að gera. Fólk er að lenda á síðast séns með að koma ökutækjunum í skoðun, til að sleppa við sektina," segir Bergur.

„Hér er alltaf stuð og stemning á síðasta degi mánaðarins, það eru þessi vanrækslugjöld sem leggjast á bíla," segir Björn Þór Hannesson, skoðunarmaður hjá Aðalskoðun.

„Íslendingar eru náttúrlega ekta þjóð fyrir þetta, geyma allt fram á síðasta dag. Einmitt þess vegna erum við að standa hér í dag. En sektin kemur ekki fyrr en á mánudaginn, þannig að fólk ætti að mæta á svæðið. Þetta eru skilaboðin til þjóðarinnar."

Mest lesið

Fleiri fréttir