Bræður ákærðir fyrir ofbeldi og hótanir

Ríkissaksóknari hefur ákært tvo bræður, 28 og 20 ára, fyrir líkamsárásir og annan þeirra fyrir hótanir. Öll brotin voru, samkvæmt ákærunni, framin 25. nóvember síðastliðinn.

Eldri bróðirinn er ákærður fyrir að hafa ráðist á mann á Kaffi Amsterdam við Hafnarstræti, kýlt hann ítrekað í höfuðið og bitið hann í eyrað. Þolandinn hlaut mörg sár á höfði, að því er segir í ákæru, djúpa skurði og rifu á neðri vör, auk þess sem flipi rifnaði af ytra hægra eyra og vinsta eyrað var sundurskorið. Þá brotnuðu í honum þrjár tennur.

Yngri bróðirinn er ákærður fyrir að hafa slegið annan mann á sama öldurhúsi sömu nótt.

Þá er sá eldri jafnframt ákærður fyrir hótanir daginn eftir í garð þess sem hann hafði beitt ofbeldi um nóttina.

„Ef þú þekkir mig raunverulega ekki þá er ég dópsali og er búinn að siga mannaveiðara á þig akkúrat núna, 200.000, þú skalt andskotinn borga mér þessar 200.000 vegna drullugangsins í gærkvöldi,“ sagði hann í einu símtalinu, samkvæmt ákærunni.

„Þú skalt útvega 200.000 frá því núna til þess fyrsta, því annars er þér hollara að koma þér frá Íslandi,“ sagði hann í öðru. Alls voru símtölin fjögur.