Vonast eftir því að samningar við Kína klárist í næsta mánuði

„Það liggja fyrir samningsdrög og það var verið að gera grein fyrir þeim og stöðu vinnunnar. Það er vonast til þess að hægt verði að ganga frá málinu í apríl," segir Árni Þór Sigurðsson, formaður utanríkismálanefndar Alþingis.

Viðræður Íslendinga og Kínverja um fríverslunarsamning þjóðanna hafa staðið yfir með hléum frá árinu 2007. Utanríkismálanefnd boðaði gesti úr utanríkis- og fjármálaráðuneytinu til fundar í morgun.

„Það hafa verið samningalotur bæði hér og í Kína um langt skeið," segir Árni Þór en loks sé farið að sjá fyrir endann á viðræðunum. Aðspurður hvort einhver sérstök vandamál séu væntanleg í viðræðunum þjóðanna á síðustu metrunum segir formaðurinn:

„Menn hafa auðvitað rætt samskipti á sviði mannréttindamála, eðlilega, og það er það sem má segja að hafi helst vafist fyrir mönnum. Hvernig eigi að koma þeim fyrir," segir Árni Þór.

Hann bendir á að í fríverslunarsamningum sem þessum sé algengt að fjallað sé um mannréttindamál.

„Við höfum verið að reyna að finna leiðir til þess að leysa þau og ég held að það sé í þokkalegum farvegi," segir Árni Þór.

Íslendingar flytja helst makríl, grálúðu og karfa til Kína. Með fríverslunarsamningi má vænta þess að tollar á útflutningi þess varnings og annars yrðu felldir niður. Sömu sögu er að segja um iðnaðarvörur og fatnað sem töluvert er flutt af til Íslands frá Kína.