Kokkalandsliðið sló þetta líka svona í gegn

Meðfylgjandi myndir voru teknar á styrktarkvöldverði kokkalandsliðs Íslands sem fram fór á LAVA veitingahúsi Bláa Lónsins á föstudaginn var. Um var að ræða fyrsta skrefið í undirbúningi liðsins fyrir heimsmeistaramótið í matreiðslu sem fram fer í Lúxembúrg á næsta ári. 

Boðið var upp á metnaðarfullan keppnismatseðil þar sem íslenskt hráefni var í öndvegi. Það er kostnaðarsamt að taka þátt í alþjóðlegum matreiðslukeppnum og því er nauðsynlegt fyrir liðið að eiga stuðningsaðila sem vilja leggja sitt af mörkum til að halda merki íslenskrar matreiðslu á lofti.

Á matseðlinum voru fimm vægast sagt ljúffengir réttir: Steinbítskinnar hægeldaðar í kryddjurtaolíu með jarðskokkum, stökku brauði og fáfnisgrasi. Grafinn lax og hörpuskel með skelfisksósu, spergilkáli, byggi, dilli og hrognum. Epla- og seljurótarseyði borið fram með vatnakarsa og heslihnetum. Lambahryggsvöðvi og – tunga með lambasoðsgljáa ásamt kartöflusmælki, villtum sveppum, sýrðum laukum, bakaðri gulrót og sítrónublóðbergi. Skyr frá Erpsstöðum og birki-brioche með hvítsúkkulaði, rabarbara og hnetusmjöri.

Örn Árnason leikari stjórnaði veislunni af sinni alkunnu snilld og boðið var upp á söngatriði með þeim Matta Matt og Magna Ásgeirssyni.

Facebooksíða kokkalandsliðisins.

LAVA - veitingahús Bláa Lónsins.

Hér má sjá umfjöllun Ísland í dag um styrktarkvöldverðinn.