Vilja skýr svör frá umhverfisráðherra

Stjórn félags Ungra umhverfissinna hvetur Sigurð Inga Jóhansson, umhverfisráðherra til að falla ekki frá stækkun friðlands í Þjórárverum. Stjórnin fellst á þau rök Landsvirkjunar um að Norðlingaölduveita sé mjög hagkvæmur virkjanakostur en svæðið sé hins vegar svo verðmætt að það eigi að vernda.

Þjórsárver eru einstök í íslenskri náttúru og á heimsvísu. Þau njóta verndar samkvæmt alþjóðlegum samþykktum, hluti svæðisins hefur verið friðlýstur frá árinu 1981 og stefnt er að því að friðlýsa mun stærri hluta þess. Hins vegar ríkir ekki sátt um það hve langt mörk verndarsvæðisins eigi að ná.

Á föstudag stóð til að Sigurður Ingi Jóhannsson umhverfisráðherra myndi undirrita samning um mikla stækkun friðlandsins við hátíðlega athöfn. Á síðustu stundu frestaði hann undirskriftinni vegna athugasemda Landsvirkjunar. Telur Landsvirkjun að málið hafi ekki verið unnið með lögmætum hætti, friðlýsingin muni útloka fyrirhugaðan virkjanakost í Norðlingaölduveitu.

Félagsskapur Ungra umhverfissinna, sem telur um 70 manns, sendi í gærkvöldi frá sér yfirlýsingu þar sem bent er á að svæðið er í verndarflokki rammaáætlunnar. Ólafur Heiðar Helgason, formaður Ungra umhverfissina, segir að ríkisstjórn sem fari eftir faglegri niðurstöðu rammaáætlunar muni aldrei samþykkja virkjanaáætlanir á svæðinu. Því vekji frestun Sigurðar Inga upp spurningar sem þarfnist skýrra svara um hvort hann muni beita sér fyrir eða gegn virkjunum á svæðinu. Hann tekur fram að hópurinn sé ekki að hvetja til mótmæla heldur til góðra verka.

Í ályktuninni segir einnig að ef það reynist stefna stjórnvalda að hluta af Þjórsárverum skuli sökkt undir vatn sé þeim gjörsamlega ofboðið. Af mörgum slæmum kostum telji þeir miðlunarlón í Þjórsárverum meðal þeirra allra verstu.

En nú er Norðlingaölduveita talin meðal hagkvæmustu virkjanakosta og Landsvirkjun hefur hefur óskað eftir því að gefið sé færi á að endurskoða hugmyndirnar með því markmiði að draga úr umhverfisáhrifum, er ekki rétt að bregðast við þeim óskum?

„Það er rétt að Norðlingaölduveita er talinn einn hagkvæmasti kosturinn, en samt setti faghópur rammáætlunarinnar svæðið í verndarflokk. Það sýnir bara svart á hvítu hve mikið verndargildi þetta svæði hefur," segir Ólafur Heiðar.