Sveik út bensín og keyrði niður á lögreglustöð

Karlmaður um tvítugt var í dag dæmdur í fjórtán mánaða fangelsi í Héraðsdómi Reykjavíkur fyrir að aka margsinnis undir áhrifum fíkniefna, vopnalagabrot og fjársvik.

Maðurinn var meðal annars handtekinn fyrir utan skemmtistaðinn Austur í mars síðastliðnum, þá vopnaður hníf og höggvopn.

Maðurinn var svo dæmdur fyrir fjársvik í lok mars á þessu ári þegar hann tók bensín á bensínstöðinni Olís við Gullinbrú fyrir um fimm þúsund krónur, án þess að greiða fyrir.

Hið athyglisverða er þó að eftir fjársvikin ók hann beinustu leið niður að lögreglustöðinni að Hverfisgötu, þar sem hann var svo handtekinn.

Maðurinn er að auki sviptur ökuréttindinum í fjögur ár.