Árni Johnsen stýrir ekki brekkusöngnum

Árni Johnsen mun ekki stýra brekkusöngnum á Þjóðhátíð í ár. Árni hefur stjórnað söngnum síðan árið 1977 og því verður þetta í fyrsta sinn í tæpa fjóra áratugi, ef undan er skilið eitt ár þegar Róbert Marshall leysti hann af hólmi, sem hann ætlar frá að hverfa. Þetta kemur fram á vef Eyjafrétta.

Ingólfur Þórarinsson, betur þekktur sem Ingó veðurguð, mun taka við stjórn brekkusöngsins. Hann hefur reglulega komið fram á Þjóðhátíð og haldið uppi góðri stemningu í brekkunni, ýmist einn síns liðs eða með Veðurguðina sér til halds og trausts.

Þjóðhátíðarnefnd þakkar Árna kærlega fyrir óeigingjarnt starf í gegnum tíðina í fréttatilkynningu sem íþróttafélagið ÍBV sendi frá sér fyrir skömmu.

Árni var um borð í Herjólfi þegar Vísir reyndi að ná í hann við vinnslu fréttarinnar.