Íslendingar elska bjór

Flestir segja bjór vera sitt fyrsta val þegar þeir drekka áfengi ef marka má nýlega könnun MMR um val Íslendinga á drykkjum.

Könnunin var framkvæmd dagana 13. – 19. júní , en þar svöruðu 984 einstaklingar yfir 20 ára aldri spurningum um sína uppáhalds drykki. Afgerandi meirihluti svarenda sögðu bjór vera sitt fyrsta val, eða um 42%. Rauðvín var fyrsta val hjá 18,7% þeirra sem svöruðu og hvítvín hjá 14,5%. Þá vilja 6,2% helst drekka sterkt áfengi. 14,3% þeirra sem svöruðu könnuninni sögðust ekki drekka áfengi.

Karlar eru mun líklegri til að velja bjór fram yfir annað áfengi, en aftur á móti eru konur líklegri til að velja rauðvín eða hvítvín. Bjór er vinsælastur hjá þeim sem yngri eru en áhuginn minnkar með auknum aldri.

Þá reyndust pólitískar skoðanir fólks setja sitt mark á könnunina. Bjórinn er vinsælastur hjá  stuðningsfólki Pírata, en um 62% af þeim sem sögðust styðja flokkinn og tóku afstöðu, settu hann sem sitt fyrsta val. Til samanburðar settu 46% stuðningsmanna Framsóknarflokksins bjórinn í fyrsta sæti og 39,9% þeirra sem styðja Sjálfstæðisflokkinn.

Skýrsluna má lesa í heild sinni hér.