Heimsþekktur afhommari kemur úr skápnum

Íslandsvinurinn Alan Chambers, sem árum saman hefur farið um heiminn til að afhomma mann og annan, er kominn út úr skápnum. Chambers biður samkynhneigða afsökunar á þeirri vanlíðan og skaða sem hann hefur unnið með starfsemi sinni.

Chambers er forstöðumaður safnaðar sem rekur 220 kirkjur sem eru gerðar út frá Flórída; Exodus International. Einn helsti tilgangur safnaðarins hefur verið að lækna fólk af samkynhneigð með hjálp trúarinnar. Þessi söfnuður hefur nú verið leystur upp í kjölfar játninga Chambers. Hann játar að hafa laðast kynferðislega, nú um sjö ára tímabil, að karlmanni. Í bréfi sem Chambers hefur birt kemur fram að hann biðjist afsökunar á þeirri vanlíðan sem hann hefur valdið fjölda samkynhneigðra, sem fyrir hans orð hafa verið að takast á við tilfinningar sem eru þeim eiginlegar. Og því að hafa kallað samkynhneigða sódómíska og eitthvað þaðan af verra. 

Chambers kom hingað til lands árið 2007 og olli þá talsverðu uppnámi; fór meðal annars í umdeilt Kastljósviðtal, en Helgi Seljan ræddi við manninn. Chambers var hér á vegum Hvítasunnusafnaðarins í Keflavík og fór víða um og flutti erindi. Kristinn Ásgrímsson forstöðumaður safnaðarins var hans hægri hönd og sagði þá, í viðtali við Fréttablaðið, að einstaklega vel hafi til tekist og dæmi væru um að Íslendingar hefðu afhommast með hjálp trúarinnar. Chambers hélt því fram að hann hafi náð tökum á þessari hneigð sinni með hjálp trúarinnar og að árlega bærust Exodus International yfir 400 þúsund símtöl frá fólki í neyð; fólki sem kirkjan hjálpaði á beinu brautina í átt til gagnkynhneigðar.

Sjá nánar fjallað um málið hér.