Uppnám á Alþingi vegna fundarboðs frá sjávarútvegsráðherra

Lögmaður forsvarsmanna undirskriftalista gegn lækkun veiðigjalds segir að þeim hafi borist hótanir af hálfu sjávarútvegsráðherra. Uppnám varð á Alþing í dag vegna málsins. Aðstoðarmaður ráðherra segist hafa gert mistök.

Þeir Agnar Kristján Þorsteinsson og Ísak Jónsson, sem settu af stað undirskriftasöfnunina fyrir helgi, mættu í morgun til fundar með sjávarútvegsráðherra í dag og skiptust á skoðunum.

Á fundinn mætti einnig Helga Vala Helgadóttir, lögmaður, og gerði hún alvarlegar athugasemdir við það hvernig staðið var að fundarboðinu. Ærið tilefni hafi verið fyrir tvímenningana að hafa með sér lögmann á fundinn vegna þess hvernig staðið var að honum.  Segir hún Agnar, sem starfar hjá Reiknisstofnun Háskóla Íslands, hafa fengið skilaboð um fundinn með tölvupósti, smáskilaboðum og talað hafi verið inn á talhólfið hans en auk þess hafi yfirmaður hans fengið afrit af fundinum með ráðherranum. 

„Það er ekki hægt að túlka þetta öðruvísi en hótun. Það er ekki alltaf hægt að skýla sér á bak við það að um mistök hafi verið að ræða. Þegar boðað var til þessa fundar var margbúið að hafa samband við manninn með ýmsum leiðum en svo fær yfirmaðurinn líka afrit af fundarboði í tölvupósti. Þetta er ekki í lagi, hverjum og einum er frjálst að hafa sýnar skoðanir og þetta er klárlega hótun þegar um er að ræða svona boðun frá ráðherra," sagði Helga Vala í viðtali við Stöð 2 eftir fundinn. 

Stjórnarandstaðan deildi hart á Sigurð Inga á þingfundi á Alþingi eftir hádegi í dag vegna málsins og vildi að að hlé yrði gert á þingfundinum en í staðinn yrði boðið til fundar í stjórnskipunarnefnd og farið yrði yfir málið ásamt ráðherra.

Helga Sigurrós Valgeirsdóttir, aðstoðarmaður Sigurðar Inga Jóhannessonar sjávarútvegsráðherra, var sú sem sendi skilaboðin fyrir hans hönd. Á fundinum í morgun baðst hún þegar í stað afsökunar og sagði að um mistök hefði verið að ræða. Í yfirlýsingu sem hún sendi frá sér fyrir fréttir, sagðist hún hafa haldið að bæði netföngin tilheyrðu Agnari og ætlunin hafi ekki verið að sverta hann eða koma honum í vanda.

Agnar sagði alla geta gert misstök og tók afsökunarbeiðnina gilda. Hann sagði yfirmann sinn hafa orðið hissa þegar hann fékk afrit af fundaboðinu.

„Maður leyfir henni að njóta vafans, ég vissi ekki hvernig ég átti að túlka þetta en veit að allir geta gert mistök," segir Agnar um málið.