Umfjöllun, viðtöl og myndir: Víkingur Ó. - KR 0-1

KR-ingar tóku þrjú stig með heim í vesturbæinn eftir 1-0 baráttusigur á Víkingi Ólafsvík á hlandblautum Víkingsvelli í dag. Það var skallamark Grétars Sigfinns Sigurðarsonar sem skildi liðin að en heimamenn voru síst lakari aðilinn í leiknum.

Fyrri hálfleikur fór hægt af stað þar sem það tók bæði lið góðann tíma að venjast vellinum í Ólafsvík, en hann var eins og blautur svampur í dag. Besta færi leiksins kom eftir rúmann stundarfjórðung þegar Bjarni Guðjónsson sendi hárfína sendindingu inn fyrir vörn Víkinga á Gary Martin sem komst einn gegn Einari en fór illa með færið. Heimamenn voru duglegri að koma sér í fínar stöður á vellinum en þegar kom að því að klára með skoti fóru skotin framhjá eða reyndust lítil áskorun fyrir Hannes Þór Halldórsson í marki KR. Staðan því 0-0 í hálfleik.

Eina mark leiksins leit dagsins ljós snemma í fyrri hálfleik. Eftir snarpa sókn gestanna fékk Atli Sigurjónsson boltann á vinstri kantinum. Hann sendi þvínæst hnitmiðaða sendingu beint á rennblauta pönnuna á Grétari Sigfinni Sigurðarsyni sem stangaði knöttinn af alefli í netið og staðan 0-1 fyrir KR-inga. Eftir markið settu heimamenn allt sitt púður í að jafna leikinn en máttu sín lítils gegn varnarmúr KR-inga.

KR-ingar voru hættulegir í skyndisóknum sínum og komust nokkrum sinnum í dauðafæri en Einar, markvörður Víkinga, var í ógnarmiklu stuði og hreinlega lokaði markinu trekk í trekk.

Leiknum lauk með sigri gestanna sem sitja sem fastasta á toppi deildarinnar. Víkingsmenn þurfa hinsvegar nauðsynlega á sigrum að halda í næstu leikjum, ætli þeir sér að spila í úrvalsdeild að ári liðnu.

Ejub: Ég er ánægður með þennan leik

,,Mér fannst við alls ekki lakari aðilinn í þessum leik, sérstaklega í fyrri hálfleik. Eftir markið var þetta erfiðara. Heilt yfir fannst mér við skapa fleiri færi, vera meira með boltann og spila betur"

Aðspurður um slaka skotnýtingu sinna manna hafði Ejub þetta að segja:

,,Það sem einkennir lið sem eru í þessari stöðu er kannski að menn finna meira fyrir pressunni. Þetta er líka bara reynsluleysi en við verðum að vona að menn fari bráðum að skora." Sagði Ejub Purisevic, Þjálfari Víkinga í leikslok.

Grétar: Við vorum klókir

,,Við leyfðum þeim kannski aðeins að vera með boltann en við nýttum okkur vel þeirra veikleika og vorum klókir í þessum leik."

Grétar vildi ekki meina að KR-ingar væru með aðra hönd á bikarnum

,,Nei nei, Það eru nokkrir leikir eftir og við tökum einn leik í einu bara. Þetta er búið að vera KR sumar og auðvitað er maður vongóður en við höldum okkur ennþá á jörðinni," sagði Grétar Sigfinnur Sigurðarson

Rúnar: Engin meistaraheppni

,,Þessi sigur leggst gríðarlega vel í mig. Við vissum að þetta yrði erfiður leikur en við unnum vel og skoruðum markið sem skipti máli"

Aðspurður um hvort hin margumtalaða meistaraheppni fylgdi KR-ingum þessa dagana hafði Rúni þetta að segja:

,,Nei þetta er ekki heppni, bara gæði í liðinu. Menn eru búnir að vinna vinnuna sína vel, eru þolinmóðir og að lokum kom bara gæðamunurinn á liðunum í ljós. Þetta var mikilvægur sigur en mótið er langt frá því að vera búið og við fögnum ekki strax," sagði Rúnar Kristinsson, hress þjálfari KR-inga.