"Þurfum vitundarvakningu vegna myglusvepps“

Fjöldi fólks á Íslandi þarf að yfirgefa heimili sín til að ná heilsu eftir að hafa búið í myglusveppasýktu húsnæði. Vitundarvakning þarf að verða í samfélaginu vegna fylgikvilla myglusvepps. Þetta er álit læknis sem þekkir sveppinn af eigin raun.

Fréttablaðið greindi í dag frá því að raka væri að finna í húsnæði 20% Íslendinga. Þá kemur framað öndunarfæraeinkenni hjá þeim sem búa í rakaskemmdum híbýlum eru 30 til 50 prósentum algengari en hjá þeim sem ekki búa við raka. Sylgja Dögg Sigurjónsdóttir, líffræðingur og myglusérfræðingur hjá Húsum og heilsu, segir myglu vaxa þar sem raki sé. Það gildi jafnt yfir ný og gömul hús og það sé mikill missklingingur að mygla myndist bara í eldri húsum.

Sylgja veit um fjölda fólks sem hefur upplifað mikið heilsutjón vegna myglusvepps og hefur þurft að yfirgefa húsnæði sitt til að ná heilsu á ný. Íris Magnúsdóttir og Guðmundur Ingi Þorsteinsson eru ein þeirra. Íris var orðin mjög veik þegar þau loksins fluttu út úr sýktu leiguhúsnæði og segir þriggja ára dóttur þeirra einnig hafa orðið fyrir barðinu á sveppnum. Hún sé sífellt kvefuð og mjög næm fyrir sýkingum.

Á morgun verður haldið málþing um raka og myglu í byggingum á Grand Hótel. Meðal þeirra sem þar taka til máls er Tómas Guðbjartsson, yfirlæknir á skurðlækningasviði Landspítala og prófessor í skurðlæknisfræði. Hann, og nokkrir kollegar hans, þekkja einkenni myglusvepps af eigin raun en sveppurinn festi rætur í skrifstofuhúsnæði hans á Landspítalanum.

„ Það var ekki fyrr en við sem störfum á sömu hæð fórum að bera saman bækur okkar að þetta kom í ljós. Ég held það sé gott fyrir alla lækna að vita hvernig það er að vera sjúklingur, en ég verð að segja það að ég skammast mín næstum því fyrir að hafa verið þrú eða fjögur ár að greina þessi einkenni rétt. Ég leitaði til fjölda kollega minna og vina í leit að réttri greiningu. Það segir ansi margt um það hvað við læknar eigum langt í land með að þekkja þessi einkenni og vita hvaða úrræði eru best. Það eru ekki í öllum tilvikum sýklalyf eða sterar, þetta er mun flóknara en það,“ segir Tómas.