Jarðarför Hemma Gunn á föstudaginn

Útför Hermanns Gunnarssonar, betur þekktum sem Hemma Gunn, verður gerð frá Hallgrímskirkju á föstudaginn næstkomandi klukkan 15. Sjónvarpað verður frá athöfninni í Valsheimilinu að Hlíðarenda og verður erfidrykkjan einnig haldin þar.

Þetta kemur fram í tilkynningu frá fjölskyldu Hemma. Þar segir að ferlið við að koma kistu hans til Íslands frá Tælandi hafi verið nokkuð langt, og því langi aðstandendum að skýra málið fyrir vinum hans og velunnurum.

„Hermann var vel tryggður og tók tryggingafélag hans strax á fyrstu dögum við keflinu og hafði milligöngu um flutning á kistunni heim til Íslands, auk þess að annast leyfi og aðra pappírsvinnu.

 

Svo ólánlega vildi hins vegar til að flugfélagið, sem tryggingafélagið hafði áður verið í tengslum við, var hætt að fljúga á milli Bangkok og Evrópu. Flækti það málið aðeins og tafði ferlið um nokkra daga," segir í tilkynningunni.