Mikill viðbúnaður í Gnoðarvogi

Konu voru veittir áverkar í íbúðarhúsi í Gnoðarvogi í Reykjavík eftir hádegi í dag. Nokkrir menn hafa verið handteknir í tengslum við málið.

Sérsveit ríkislögreglustjóra handtók mennina eftir að tilkynning barst um málið. Ekki liggur fyrir hvort að mennirnir séu grunaðir um að hafa veitt konunni áverkana, eða hvort hún hafi hlotið þá með öðrum hætti.

Lögreglan var með töluverðan viðbúnað í Gnoðarvoginum í dag, um sjö lögreglubílar keyrðu fram og til baka í götunni og tæknideild lögreglunnar var lengi að störfum í íbúð konunnar.

Samkvæmt upplýsingum fréttastofu er rannsókn málsins enn á frumstigi og verst lögreglan allra frétta af málinu. Ekki fást upplýsingar um líðan konunnar.