Þrír nemar til sálfræðings á dag

Daglega sóttu þrír nemendur Verkmenntaskólans á Akureyri þjónustu eina starfandi skólasálfræðingsins í framhaldsskóla á landinu. Enginn annar framhaldsskóli býður upp á sálfræðiþjónustu fyrir nemendur sína.

Brynhildur Pétursdóttir, þingkona Bjartrar framtíðar, segir nauðsynlegt að skoða hvar þörf fyrir skólasálfræðinga sé mikil og finna fé til að koma sálfræðingum í fleiri skóla.

„Það á að finna peningana í þetta þar sem þetta sparar til lengri tíma. Svona forvarnir geta komið í veg fyrir að krakkar hætti í skóla eða verði alvarlega veikir. Öllum peningum sem eru notaðir til að grípa inn í á fyrri stigum er vel varið.“

Kristján Þór Júlíusson heilbrigðisráðherra bendir á að heilbrigðisþjónustan fjármagni ekki framhaldsskóla og því verði að taka ákvörðun innan hvers skóla fyrir sig hvort rekstrarféð skuli nýtt í sálfræðiþjónustu.

Hann undirstrikar að það þurfi að gera mat eða rannsókn til að sjá hvernig þjónustan gafst í VMA. „Það er nauðsynlegt að greina þetta betur til að sjá hver árangurinn var,“ segir hann. Ef framhaldsskólar landsins leiti í framhaldinu eftir fé til að koma þjónustunni í fleiri skóla verði það skoðað þegar þar að kemur.

Hjalti Jónsson, sálfræðingurinn í VMA, segir þörf fyrir slíka þjónustu mikla, en hann var ráðinn í hálfa stöðu sem skilaði sér í þremur viðtölum á dag alla önnina auk hópmeðferðartíma. Rúmlega tíu prósent nemenda VMA nýttu sér þjónustuna, en hlutfallið var hærra meðal þeirra sem eiga lögheimili utan Akureyrar, eða 14 prósent. Níu prósent akureyrskra nemenda komu í viðtal til Hjalta.

„Þetta er sérstaklega nauðsynlegt fyrir framhaldsskóla sem sinna nemendum sem eru fjarri heimabyggð,“ segir hann. „Þetta færir þjónustuna skrefi nær krökkunum, gerir hana að minna tabúi og verður sýnilegri. Þetta leysir vandamálin í upphafi í stað þess að þau vindi upp á sig.“

Hjalti Jón Sveinsson, skólameistari VMA, segir þjónustuna komna til að vera þar sem svo augljós þörf sé fyrir hana meðal nemenda skólans. 

Samkvæmt tölum frá nokkrum framhaldsskólum sem Fréttablaðið sagði frá í vor eru kvíði, þunglyndi og andleg veikindi nefnd sem ástæða brottfalls úr skóla í um níu prósentum tilfella.