Ragnar á lista með þeim bestu

Einn af sérfræðingum Artspace, sem er rafrænn markaður með nútímalist, telur Ragnar Kjartansson, með þrjátíu bestu listamönnum sem eru með verk á listakaupstefnunni í Basel í Sviss, stærstu kaupstefnu með nútímalist í heiminum.

 

Á listanum með Ragnari eru Andy Warhol, Mark Rothko, Alexander Calder, Dan Flavin, Richard Prince, Roy Lichtenstein að ógleymdum sjálfum Pablo Picasso. Verk eftir alla þessa listamenn seljast á milljónir dollara, sum á tugi milljóna dollara.

Nú er spurningin: mun Ragnar ná að fylla þennan flokk?

Ragnar Kjartansson hefur þegar náð góðum árangri á alþjóðavísu, en Fréttablaðið greindi frá því á dögunum að ítalskur safnari hefði keypt eftir hann verk á tæpar 30 milljónir.

Ragnar Kjartansson er á mála hjá íslenska galleríinu i8. Hann er fjölhæfur listamaður og leggur meðal annars stund á svokallaða gjörningalist samhliða gerð vídeóverka, teikninga, og annarra verka.

Um þessar mundir er verk eftir Ragnar Kjartansson, S.S. Hangover, til sýnis á Feneyjartvíæringnum.