Gerður í Gerðarsafni

Á sumarsýningu Gerðarsafns má finna valin verk eftir Gerði Helgadóttur.

"Fyrsta einkasýning Gerðar Helgadóttur myndhöggvara (1928-75) hér á landi árið 1952 markaði tímamót í íslenskri sjónlistasögu. Þessi unga listakona gerðist brautryðjandi í þrívíðri abstraktlist með nýstárlegum járnverkum og tók fyrst kvenna forystu í höggmyndlist hérlendis," segir í tilkynningu frá Gerðarsafni í Kópavogi.

Fáeinum árum síðar varð Gerður einnig frumkvöðull í glerlist á Íslandi: "Steindir gluggar hennar í Skálholtskirkju frá 1959 eru sannkallað stórvirki og einstakt framlag til abstraktlistarinnar hér á landi.  Á næstu árum voru afköst Gerðar með ólíkindum og listsköpun hennar margvísleg, þar sem hvert tímabilið rak annað með fjölbreyttum og heillandi verkum, jafnt í þrívídd sem glerlist."