Sextíu og þrír óku of hratt

Alls sinnti lögreglan á Selfossi 207 verkefnum í síðustu viku, en þar á meðal voru stimpingar og umferðaróhöpp.

Fjöldi manns var í Árnesssýslu um helgina  Á Eyrarbakka kom fólk saman og fagnaði Jónsmessu og á Selfossi voru margir samankomnir á landsmót Fornbílaklúbbsins. 

Allt gekk án teljandi óhappa að samkvæmt upplýsingum lögreglu, þó einhverjar stimpingar hafi átt sér stað hér og þar.  Hjá lögreglu voru skráð 207 verkefni í síðustu viku.

Jeppabifreið skemmdist mikið er henni var ekið útaf Einholtsvegi í Bláskógabyggð með þeim afleiðingum að hún fór nokkrar veltur.  Sex ferðamenn voru í bifreiðinni sem sluppu við meiðsli.  Jeppinn var óökufær eftir og hann fluttur á vagni af vettvangi.

Fólksbifreið var svo ekið á ljósastaur á Stokkseyri síðastliðinn laugardag. Staurinn brotnaði og bifreiðin skemmdist það mikið að hún varð óökufær.  Ökumaður slasaðist ekki.

Í liðinni viku voru síðan 91 ökumaður kærður fyrir ýmiss konar umferðarlagabrot.  Þar af voru 63 kærðir fyrir hraðakstur, 12 fyrir að hafa ekki notað öryggisbelti, 2 fyrir akstur undir áhrifum ávana- og fíkniefna og 1 fyrir ölvunarakstur.