Myndavélaeftirlit tekur af allan vafa

Reykjavíkurborg býður út akstur fatlaðra á næstu mánuðum. Grétar Pétur Geirsson, formaður Sjálfsbjargar - landssambands fatlaðra, segir mikilvægt að koma upp eftirlitsmyndavélum í bílum hjá þjónustuaðilum.

Í maí tilkynntu tvær fatlaðar konur um kynferðisbrot af hendi bílstjóra hjá Smartbílum, fyrirtæki sem sér um akstur fatlaðra í Garðabæ, Kópavogi og Mosfellsbæ. Maðurinn var sakaður um að hafa nauðgað annarri konunni og áreitt hina kynferðislega. Grétar segir að þetta mál hafi sýnt fram á mikilvægi eftirlits. Slíkt eftirlitskerfi muni líka vernda bílstjórana.

„Við teljum þetta vera einfalda leið til að hafa eftirlit með því sem er að gerast í bílunum. Í ljósi þess sem hefur komið upp er þetta ódýrasta leiðin til að koma í veg fyrir svona hluti," segir hann.

Grétar segir að með þessum einfalda hætti sé öryggi allra tryggt, það fari ekki á milli mála hvað gerist í bílunum.

„Þarna er orð gegn orði og það er alltaf erfitt að eiga við svona hluti. Myndavélarnar taka af allan vafa,“ segir Grétar.

Strætó sér nú um ferðaþjónustu fatlaðra en að loknu útboði munu einkaaðilar sinna akstrinum.